روايات وقصص

حطيت فى ايد اختى يوم فرحها نص مليون جنيه

يا أختي.. أنا هعيش مبسوطة وهرفع رأسك.
طبطبت على ضهرها وقولت والوجع في قلبي
لو لقيتي نفسك مش مبسوطة، ارجعيلي يا قلب أختك، بيتي يساعنا سوا.
ركبت العربية وهي بتعيط، والعربية مشيت وأنا انهرت من الدموع.
كنت فاكرة إني أمنتلها مستقبلها واديتها خط رجعة يحميها.. كنت فاكرة إن دفتر التوفير ده هيخليها ترفع رأسها ومحدش في بيت جوزها.
لحد ما العربيات بدأت تتحرك، ولمحت أم طارق وطت برأسها من شباك العربية وبتسأل منة بصوت عالي سمعه الجيران
الدفتر الأحمر اللي أختك ادتهولك جوة ده.. شيلتيه فين بالظبط؟
02
بعد تلات سنين، منة رجعت.
ليلتها كنت راجعة من الشغل متأخر، ونور السلم كان مقطوع وضلمة.
لقيتها واقفة قدام باب الشقة في الضلمة، وجنب رجلها شنطة سفر قديمة ومتبهدلة ومربوطة بحبل.
شعرها كان مقصوص قصير وجاف، ووشها خاسس وضايع وعينيها دبلانة.. لدرجة إني ملقطتهاش من أول نظرة.
منة؟!
رفعت رأسها وبصتلي، وحاولت تبتسم ابتسامة مكسورة
أيوة يا أختي.. أنا رجعت.
الابتسامة دي كانت تقطع القلب وأصعب من مية عيطة.
شدتها من إيدها ودخلتها الشقة بسرعة.
أمي كانت طالعة من المطبخ وفي إيدها معلقة الطبخ، أول ما شافت منة، اتسمرت مكانها وحواجبها اتقفلت بغضب وقلق
إيه ده؟ إنتي جاية لوحدك ليه في وقت زي ده؟ فين طارق؟
منة زقت الشنطة جنب الحيطة وقالت بنبرة ميتة وخالية من الروح
اتطلقنا.
المعلقة وقعت من إيد أمي ورنت في الأرض، وصوتها صوّت في الشقة
إييييه؟! اتطلقتوا؟ يا مصيبتي السودا!
مسكت إيد منة بسرعة، لقيتها تلاجة.. سقعة وبتترعش بشكل يخوف.
الكلام ده حصل إمتى؟
النهارده الصبح في المحكمة طلاق رسمي.
وفين قسيمة الطلاق والورق؟
طلعت من شنطة إيدها كام ورقة مكمشين وادتهملي.
فتحت أول ورقة، وقلبي هبط في رجلي وأنا بقرأ الشروط والمخالصة
الطلاق تم بالإرادة والتراضي بين الطرفين.
تنازل الزوجة عن كافة مستحقاتها الشرعية والمالية مؤخر الصداق، نفقة المتعة، ونفقة العدة.
تنازل الزوجة عن أي منقولات أو مصاريف تجديد

تمت في شقة الزوجية.
خروج الزوجة بملابسها الشخصية فقط دون المطالبة بأي أثاث أو أجهزة.
وفي خانة التوقيع، كان اسم منة عبد الرحمن مكتوب بخط ثابت وواضح بس حزين.
بصيت للورق وأنا مش مصدقة، وصوابعي بتترعش من الغيظ
من غير أي حقوق؟ رميتي كل حاجتك ليهم؟
هزت رأسها بإيجاب وهي باصة في الأرض.
أمي بدأت  وتزعق وتصوت
يا خيبتك القوية! يا غبيّة يا خايبة!
تلات سنين جواز، وراجعة بشنطة هدوم  ؟
أهله مادوكيش ولا مليم من قايمتك وفلوسك؟
منة قالت بصوت واطي ومكسور
أنا اللي مش عايزة منهم حاجة، كنت عايزة أنفد بجلدي وبس.
أمي عروقها نفرت من الغضب وعينها لفت
مش عايزة؟! هو إنتي كنتي رايحة تتفسحي ولا كنتي في بيت جوزك بتخدمي وتعمري؟ أمال فين الفلوس ودفتر التوفير اللي أختك ادهالك يوم فرحك؟ طار هو كمان؟
جفون منة ارتعشت وقالت بخوف
زي ما هو.. موجود ومشلتش منه حاجة.
قمت من مكاني زي المجنونة.
دفتر التوفير اللي اديتهولها من تلات سنين، فاكراه حتة حتة.. دفتر أحمر شيلتهولها في جيب سري في شنطة جهازها. كل ما كانت تيجي تزورنا وأسألها عليه، تقول لي متشال في الحفظ والصون ومحدش يعرف عنه حاجة.
دخلت أوضتها القديمة، لقيت الدولاب أمي كابسة فيه الحفة وبطاطين شتوية وثقيلة.
بقيت أشيل البطاطين وأرميها على الأرض بعصبية لحد ما وصلت لل سحارة الخشب القديمة اللي تحت.
القفل بتاعها كان مصدي وبايخ، ومنة كانت واقفة على باب الأوضة بتبص عليا ببرود ومحاولتش تمنعني.
دورت في شنطتها القديمة عن المفتاح وفتحت القفل بعد عذاب.
لقيت الدفتر الأحمر ملفوف في قماش قطيفة أسود.
الدفتر نظيف وزي ما هو، حتى أطرافه مش متنية ولا متبهدلة.
كأن مفيش إيد لمسته طول التلات سنين

دي!
قلبي ارتاح لثانية، بس في نفس اللحظة جالي هبوط وخوف.. فتحت الدفتر وبصيت على خانة الرصيد الحالي.
المبلغ الأصلي 500000 جنيه.
الحالة الشهادة اتجددت تلقائي بعد تلات سنين بفوائدها التراكمية.
الرصيد الإجمالي 610375 جنيه.
ولا مليم واحد اتسحب من المبلغ الأصلي! مفيش أي حركة سحب نهائي طول السنين اللي فاتت.
بصيت للأرقام ودماغي لفت.. تلات سنين جواز، تخرج بملابسها الشخصية بس، مفيش قرش تحويشة في جيبها، ومع ذلك ملمستش الفلوس دي!
أمال كانت بتاكل منين؟ وبتلبس منين؟ ولو تعبت وسخنت كانت بتتعالج إزاي وتروح لدكاترة؟!
خرجت بالدفتر في إيدي، وأول ما منة شافت وشي وعيني المحمرة، وطت رأسها في الأرض وقالت بنبرة رجاء
يا أختي.. أرجوكي متسأليش في اللي فات.
رزعت الدفتر على الترابيزة وقولت بزعيق والدموع في عيني
ماسألكيش إزاي؟! ال 500 ألف جنيه دول منقصوش مليم! تلات سنين كاملة كنتي عايشة على إيه وبتصرفي منين في الغلا ده؟!
بوقها اتهز بس مكنتش قادرة تنطق من كتر العياط المكتوم.
أمي خطفت الدفتر من إيدي وبصت فيه بلهفة، وشها ارتاح شوية لما لقت الفلوس موجودة وزادت، بس رجعت تبرطم وتلومها
الحمد لله إنهم منقصوش.. الفلوس في إيد البنت سترة برضه أحسن ما كانت تضيع في الهوا على طارق وأمه.
بصيت لأمي بذهول وعصبيّة وصرخت فيها
يا أمي! بنتك راجعة مطلقة ومكسورة ومعاهاش مليم واحد في جيبها، وأول كلمة تقوليها الحمد لله إن الفلوس منقصتش؟! إنتي إيه؟!

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى