رجعت من عند أمي على بيت عيلة جوزي علشان أسلم على سلفتي وجوزها اللي رجعوا من السفر، بس اتفاجأت لما لقيتهم قاعدين في شقتي، وسلفتي لابسة قميص من دولابي، وضحكت ببرود وقالت: “معلش، لسه مفضيتش الشنطة”.
ولما سألت جوزي عن اللي حصل، رده صدمني وخلاني أسكت تمامًا!
أنا متجوزة من ثلاث سنين، وربنا رزقني بولد عنده سنة ونص، مالوش ذنب في أي حاجة بتحصل حواليا.
من يوم ما اتجوزت وحياتي عبارة عن محطات انتظار. جوزي وأخوه بيسافروا مع بعض عشان الشغل، بس الفرق إن أخوه بياخد مراته معاه عشان عندهم شقة هناك بيقعدوا فيها، أما أنا فبفضل هنا، قاعدين في بيت عيلة جوزي.
الشقة الوحيدة المبنية وتشطيبها كامل في البيت كله هي الشقة اللي في الدور الثاني، الشقة اللي أنا عايشة فيها ودخلت فيها عروسة.
من كام يوم، استأذنت وحزمت شنطتي الصغيرة وأخدت ابني وروحت عند أمي، أغير جو وأريح شوية من مسؤوليات البيت. كنت مخططة أقعد يومين وارجع.
وفي اليوم الثاني بالليل، لقيت حماتي بتتصل بيا.
قالتلي:
“ألو.. إزيك يا نهى؟ أصل ابني أحمد ومراته وصلوا بالسلامة من السفر دلوقتي، قولت أقولك عشان لو عايزة تيجي تسلمي عليهم.”
فرحت بصراحة، وقولت في بالي: أصول برضو، ألم حاجتي وأخد ابني وأرجع عشان أقولهم حمد الله على السلامة وأقوم بالواجب.
لميت الشنطة في ثواني، وركبت ووصلت بيت العيلة.
دخلت من الباب الكبير، ودخلت شقة حماتي تحت، لقيت حماتي قاعدة لوحدها بتتفرج على التلفزيون.
بصيت حواليها باستغراب وقولت:
“إيه ده يا ماما؟ أومال فين أحمد ومراته؟ مش هم وصلوا؟”
ردت عليا بنبرة باردة:
“أه وصلوا يا حبيبتي.. طلعوا يريحوا فوق في الشقة.”
تنحت وبرقت عيني.
“فوق فين يا ماما؟ هي في شقة فوق غير شقتي؟”
قالتلي بكل برود:
“هي فين الشقة اللي حيلتنا غيرها؟ طلعوا يرتاحوا في شقتك!”
دمي اتجمد في جسمي.
“شقتي أنا؟! إزاي يعني طلعتيهم شقتي وأنا مش موجودة، ومحدش استأذنني ولا حتى قالي؟!”
بصتلي بنظرة كلها استهانة وقالت:
“وفين المشكلة يعني؟ دول راجعين من سفر وتعبانين، وهيقعدوا 15 يوم بس واخدين إجازة وهيمشوا تاني.. هيمسكوا الشقة الكام يوم دول لحد ما ربنا يسهل ونبني شقة ثانية فوقيهم.
وبعدين يا حبيبتي انتي متعرفيش؟ الشقة دي أصلاً كانت بتاعتهم قبل ما يسافروا، ولما سافروا سابوها لجوزك عشان يتجوز فيها ويسكن، فمش عيب يعني لما يرجعوا ياخدوا حقهم كام يوم!”
كنت حاسة إن الأرض بتلف بيا. الكلام نزل عليا زي الصدمة.
دي شقتي اللي فيها أسراري، هدومي، حياتي، والمكان الوحيد اللي بدخل أقفل بابه عليا!
جمعت شتات نفسي وقلت لها وأنا بمسك دموعي بالعافية:
“طب حتى لو كدة يا ماما.. كنتِ اتصلي بيا قوليلي! كنت جيت لميت حاجتي، قفلت غرفة نومي، وشيلت هدومي الخاصة والداخلية اللي منشورة على المنشر في البلكونة! إزاي يدخلوا وأنا سيبة شقتي كدة؟!”
لقيتها زادت في حدتها وقالت:
“جرى إيه يا بت أنتِ؟! هما هيتفرجوا على هدومك يعني؟! ولا هيركزوا في الغسيل؟! وبعدين تقفلي غرفة النوم؟ هما لو قفلتيها هيناموا فين يعني؟ هيناموا في الصالة؟!”
كنت حاسة إني في كابوس، ومش قادرة أستوعب إن ده بيتقال في وشي.
سألتها بدهشة وكسرة نفس:
“طب وأنا.. أنا وابني دلوقتي هنام فين؟”
ردت عليا:
“تنامي معايا هنا تحت الكام يوم دول.. هفضيلك سرير تنامي عليه أنتِ وابنك، أو لو مش عاجبك ارجعي عند أمك اقضي الـ15 يوم دول هناك لحد ما يمشوا.. اللي تحبيه اعمليه، كده كده جوزك مش موجود!”
طلعت السلم وأنا رجليا مش شايلاني. كل خطوة بصعدها كانت بتهد حاجة جوايا.
ابني على إيدي بيعيط وأنا مش قادرة أهديه. حاسة إني غريبة في بيتي، وحاسة إن ماليش خصوصية ولا مكان في البيت ده.
وصلت للدور الثاني، وقفت قدام باب شقتي.. الباب اللي أنا بفتحه بالمفتاح بتاعي، لقيته مفتوح.
خبطت خبطة خفيفة وفتحت الباب..
وهنا كانت الصدمة الأكبر.
فتحتلي سلفتي الباب، واقفة بابتسامة مستفزة، ولابسة قميص نوم من دولابي أنا! قميصي الخاص اللي شاريه في جهازي!
بصيت لها بذهول، وعيني رايحة جاية على القميص وعليها، مش قادرة أنطق كلمة. لساني اتعقد.
بصتلي بكل برود، وضحكت ضحكة باهتة مليانة استهانة وقالتلي:
“معلش بقى يا نهى.. أصل أنا لسه مفضيتش شنطتي ومكسلة أفتح الشنط وأدور على هدوم، ففتحت الدولاب وأخدت القميص ده ألبسه.. معلش بقى!”
دخلت الصالة وأنا مش مصدقة اللي بشوفه.
وقبل ما أستوعب اللي هي قالته، خرج أخو جوزي من غرفة نومي، طالع ولابس ترنج بيتي من بتاع جوزي!
غرفة نومي مفتوحة، ومرمية فيها شنطهم، وعيني جت بالصدفة على المنشر.. هدومي الخاصة والداخلية لسه منشورة زي ما سبتها، محطوطة قدام عين أخو جوزي كأن ماليش أي خصوصية.
وقفت في نص الصالة، شايفة بيتي مستباح، هدومي بتتلبس، سريري بيتنام عليه، وأنا واقفة زي الغريبة بالضبط في بيتي اللي مفروض إنه مكاني.
نزلت فورًا من عندهم وكلمت جوزي.
هو عارف إن أخوه نازل، وأكيد عارف إن مفيش مكان يقعد فيه غير شقتنا. إزاي يسمح بالموقف ده؟ وليه مدانيش خبر؟
كنت فاكرة إنه هيزعق زي أمه ويقولي: “إنتِ مالك”، أو حتى يعتذر ويحاول يهديني.
لكن الكلام اللي قاله كان عجيب جدًا، خضني وخلاني أسكت تمامًا.
أول ما سمعت صوته على الناحية الثانية، كنت بلهث والدموع مالية عيني، قولتله وأنا منهارة من القهرة:
“إيه اللي بيحصل ده يا كريم؟! إزاي تسمح لأخوك ومراته يدخلوا شقتي؟ سلفتي لابسة قميصي، وأخوك طالع من أوضة نومنا بلبس من بتاعك! أمك بتقولي ارجعي لأمك أو نامي معاها تحت! أنت فين من كل اللي حصل ده؟!”
كنت متوقعة يزعق، أو يبرر، أو حتى يطلب مني أستحمل عشان أخوه.
لكن كريم سكت.
سكوته كان مرعب.
سمعت صوت تنهيدة طالعة من قعر قلبه، وقالي بصوت واطي ومكسور هزني من جوايا:
“نهى.. ارجعي بيت أمك حالًا.. خدي ابنك وانزلي دلوقتي، ومتفتحيش كلام مع أمي ولا مع أخويا.. اسمعي كلامي من غير ما تسألي، أنا جاي مصر بكرة الصبح.”
قولتله بصدمة:
“أرجع بيت أمي؟! أنت بتتكلم بجد؟ أنت بتبعدني عشان خاطرهم؟!”
رد عليا بنبرة أول مرة أسمعها في حياته:
“يا نهى عشان خاطري وحياة ابننا اسمعي الكلام. الشقة دي مش شقتنا.. وأنا أضعف من إني أقف وشهم دلوقتي. ارجعي وأنا هفهمك كل حاجة لما أجي، بس وحياة أغلى حاجة عندك انزلي فورًا ومتخليش حد يحس بحاجة.”
قفلت معاه وأنا حاسة إن عقلي هيطير.
الشقة مش شقتنا؟!
إزاي يعني؟ ده أنا مجهزاها حتة حتة معاه، ده أنا دهان الحيطان دي طالعة عيني فيه!
نزلت السلم وجسمي كله بيتراشف.
حماتي بصتلي وقالت:
“إيه.. نازلة ولا هتبيتي تحت؟”
بصتلها بمنتهى الكسرة وقولت:
“أنا رايحة لأمي يا ماما.”
قالت ببرود:
“يكون أحسن برضو.. مع السلامة.”
أخدت ابني ورجعت بيت أمي.
طول الطريق الدموع مش بتوقف، وأمي أول ما شافتني بالمنظر ده اتخضت.
حكيتلها كل حاجة، وأمي كانت عايزة تتصل بأبويا وإخواتي يروحوا يهدوا الدنيا، بس أنا مسكت فيها وقولتلها:
“استني.. كريم جاي بكرة وقال هيفهمني.. في حاجة غلط.”
الليل ده ممرش عليا.
كل ثانية بتفوت عليا كأنها سنة. أفكار تودي وأفكار تجيب.
يعني إيه الشقة مش شقتنا؟ يعني أنا كنت عايشة في وهم؟ وليه كريم خايف من أخوه كده؟
تاني يوم على الضهر، جرس الباب رن.
فتحت لقيت كريم واقف قدامي، شكله يقطع القلب.. وشه متغير، وعينيه مرهقة، ودقنه طويلة كأنه مانامش بقاله أيام.
دخل وسلم على أمي وطلب يقعد معايا لوحدنا.
قعدنا في الصالة، وبدأ الكلام وهو بيبص في الأرض، ومش قادر يحط عينه في عيني.
قال:
“نهى.. أنا عارف إنك مصدومة، وإن اللي حصل فيكِ إمبارح يكسر أي ست.. بس أنا مكنش قدامي غير كده.”
مسكت إيده بقوة وقولتله:
