بنتي كانت مرمية في أرضية الحمام فاقدة الوعي حكـايات مني السيد
الكلبش كان بارد على معصم فتحي، بس الدم اللي بيغلي في عروقه كان كفيل يدوب الحديد. قعد ورا في البوكس، عينه على عربية الإسعاف اللي مشغلة السارينة وطايرة بمريم على المستشفى الجوي. ريحة الصاج القديم وبنزين البوكس فكرته بأيام زمان، أيام ما كان بيعافر من تحت الصفر لحد ما بنى إمبراطورية شحن وتفريغ ومخازن عملاقة ممتدة من مواني إسكندرية وبورسعيد لمناطق 6 أكتوبر والعبور، وكل ده متسجل بشركات قابضة ومحافظ استثمارية محدش يربط بينها وبين الراجل اللي لابس جلابية وسديري وقاعد في شبرا.
سميحة وطارق افتكروا إن اللعبة خلصت أول ما البوابة اتقفلت والشرطة خدت الراجل الغلبان. ما كانوش عارفين إن فتحي وهو بيتكلبش، داس على زرار اتصال سريع في موبايله الزراير القديم، اتصال مباشر لمستشاره القانوني وذراعه اليمين في كل العمليات المالية المعقدة المستشار وحيد الرشيدي.
في قسم التجمع، الضابط النبطشي بص لفتحي من فوق لتحت
بقى أنت يا راجل يا كبير تكسر بوابة فيلا بنص نقل وتتهجم على ناس محترمين في بيوتهم؟ أنت عارف عيلة الديب دول مين؟ دا الباشا طارق مبهدل الدنيا ومقدم بلاغ شروع في تعرض وإتلاف ممتلكات، وأمه سميحة هانم بتطالب بتعويض نص مليون جنيه غير الحبس!
فتحي كان باصص للأرض، صوته هادي زي سكون ما قبل العاصفة
حقي أعمل مكالمة يا باشا؟
الضابط رمى الموبايل قدامه باستهزاء
اتفضل يا عم، كلم اللي يضمنك، بس متفكرش إن في محامي تحت السلم هيطلعك من قضية التعدي دي.
فتحي مسك التليفون، رن رنة واحدة. الطرف التاني رد قبل الرنة التانية
أوامرك يا فتحي بيه؟ سامع دوشة عندك، خير؟
فتحي اتكلم بهدوء تقيل يقطع شرايين
يا وحيد، بنتي مريم اتغدر بيها ومحقونة في فيلا الديب في التجمع، ومنقولة المستشفى الجوي بين الحياة والتعب. وأنا مقفول عليا في قسم التجمع عشان كسرت بوابتهم بالعربية… اسمعني كويس، الليلة دي مش هتعدي غير لما كل كارت متأجل يترمي ع الترابيزة. عايز طاقم دكاترة خاص من أكبر استشاريين سموم وجنايات يدخلوا المستشفى الجوي فوراً ويحرزوا كل عينة دم قبل ما حد يلعب في التقارير. وعايز ملف عيلة الديب كله قدامي الليلة. كل ورقة، كل كمبيالة، كل سطر في البنوك، والشركات اللي بتستورد قطع الغيار باسم والده المتوفى وبيغسلوا بيها ديونهم… اقلب عاليها واطيها يا وحيد.
الضابط رفع عينه من الورق وبص لفتحي بذهول. النبرة والأسلوب وطريقة الكلام مكنتش نبرة سواق ولا راجل مسن جاي يستعطف حد.
خلال خمسة وأربعين دقيقة بس، باب القسم اتفتح، ودخل المستشار وحيد الرشيدي ومعاه تلاتة من أكبر محامين الجنايات في مصر، ومعاهم اتنين بودي جاردات شايلين شنط جلد تقيلة. في نفس اللحظة تليفون مأمور القسم رن، وبدأ الهرج والمرج في المكاتب. المحاضر اتبدلت، واتفتح محضر شروع في تعرض واحتجاز غير قانوني وتعذيب لمريم فتحي الصاوي، مدعوم بصور حية وفيديوهات لكاميرات زرعها فتحي في عربية بنته رصدت آخر مكالمة وصوت الاستغاثة والأذى.
فتحي خرج من القسم من غير ما يتبص في وشه غير باعتذارات وتأدية التحية، لكن عينه كانت شايفة حاجة واحدة بس المستشفى.
في المستشفى الجوي، كانت ريحة المعقمات تخنق. مريم محطوطة على أجهزة التنفس الصناعي في العناية المركزة، وشها شاحب زي القطن، ودراعاتها عليها علامات زرقة وورم مشوه مكان الحقن العشوائي.
الدكتور الاستشاري الخاص اللي بعته وحيد قرب من فتحي
فتحي بيه، الحمد لله لحقناها في آخر لحظة. البنت ماكانتش واخدة منوم زي ما اتقال في الإسعاف. دي كانت محقونة بمادة مهدئة قوية جداً بتعمل هبوط حاد في عضلة القلب والجهاز العصبي، وكان مقصود إنها تفقد الوعي تماماً عشان يظهر كأنه تعب نفسي لو وقفت عضلة القلب. غير إن جسمها فيه آثار حروق سجاير قديمة وكدمات في القفص الصدري متدارية بقالها شهور.
فتحي مسك إيد بنته الباردة، دموعه نزلت ساكتة من غير صوت. مسح على شعرها وهمس
حقك هيرجع يا مريم… ودين ربنا لأخليهم يدفعوا تمن كل دمعة وكل وجع بالأضعاف المضاعفة. مش هسيب فيهم حد واقف على رجليه.
التفت لوحيد اللي كان واقف وراه ومعاه اللاب توب والملفات
قولي يا وحيد، موقف عيلة الديب المالي والقانوني إيه؟
وحيد فتح الملفات وبدأ يسرد
عيلة الديب على شفا حفرة يا فتحي بيه. هما عايشين على المنظرة الكدابة. طارق وأمه سميحة واخدين قرض من بنك التنمية والاستثمار بضمان أرض المصنع ومبنى فيلا التجمع بقيمة 85 مليون جنيه عشان مشروع استيراد فاشل. الفوايد ركبتهم، والقسط الأخير متأخر بقاله شهرين والبنك باعت إنذار بالحجز. والأهم من كده… البنك اللي هما مقترضين منه، 40 من محفظة ديونه متغطية بودايع لشركات سيادتك، ورئيس مجلس إدارة البنك راجلنا وشركته وسيطة معانا في الشحن.
فتحي عينه لمعت بغضب بارد
حلو… وإيه كمان؟
طارق كان متجوز مريم وهو فاكر إنه ممكن في أي لحظة يضغط عليها تخلّي حضرتك تبيع بيتك القديم أو تسلفه قرشين، بس لما لقى الموضوع مش جايب همه بدأ يفرغ عقده فيها، وكان بيخطط يكتبها شيكات على بياض وهي تحت تأثير المهدئات دي عشان يلبسها ديونه ويهرب برا البلد هو وأمه.
فتحي وقف بكل هيبته، عدل ياقة قميصه وقال بصوت كالفولاذ
أولاً البنك يشتري مديونية طارق كاملة الصبح بدري، وتتحول الديون لحساب شركاتنا فوراً. الإجراءات تبتدي بالحجز على الفيلا والسيارات والمصنع قبل ما النهار يطلع بعد بكرة.
ثانياً ياسين حفيدي، ما يفضلش دقيقة واحدة تحت سقف فيه سميحة ولا طارق. أمر منع سفر لطارق وأمه، وقضية ضم حضانة مستعجلة بأمر وقتي مع إثبات تعاطي وشروع في تعرض.
ثالثاً مصنع قطع الغيار بتاعهم، كل تعاملاته مع المواني والمستودعات تتجمد الليلة دي. مفيش حاوية واحدة تخرج ولا تدخل باسمهم.
وحيد ابتسم ابتسامة فهم
