بنتي كانت مرمية في أرضية الحمام فاقدة الوعي حكـايات مني السيد
في اللحظة دي، طارق اتسحب على برة تحت أنظار الجيران في كمبوند التجمع، اللي كانوا طالعين في البلكونات وواقفين على أبواب الفلل يتفرجوا على الفضيحة اللي ملهاش مثيل. عربيات البوكس خدت طارق على النيابة، وسميحة وقفت في الشارع بشنطة يد صغيرة بعد ما اتمنعت تاخد حتى مجوهراتها اللي اتحرزت بحكم المحكمة لسداد الديون.
في المستشفى الجوي، كانت الساعة داخلة على الضهر. الشمس دخلت من شباك أوضة الرعاية المركزة اللي فتحي حجزها بالكامل ونقل فيها أحسن فريق طبي وتمريضي في القاهرة.
مريم بدأت تفتح عينيها ببطء شديد. الرؤية عندها كانت مشوشة، ريحة البنج والمحاليل مالية مناخيرها، وكل حتة في جسمها بتوجعها كأنها اتفرمت تحت ضغط. حركت صوابعها المربوطة بالشاش، فلقت إيد خشنة، دافية، ومليانة أمان بتمسكها بحنية تداري وجع السنين.
يا.. يا بابا؟
صوتها كان طالع ضعيف، مجروح ومبحوح من الصراخ.
فتحي كان قاعد على كرسي خشب جنب السرير، وشه شاحب وتجاعيده باينة، بس عينيه كانت بتلمع بقوة جبارة. باس جبينها ومسح دموعها بطرف صباعه
قلب أبوكي يا مريم.. روح أبوكي من جوة. حمد الله على سلامتك يا ضنايا. كابوس وانتهى، والشخص اللي مسك شعرة منك حسابه معايا بدأ ومش هيخلص.
مريم دموعها نزلت شلال، حاولت تتعدل بس الألم في ضهرها وصدرها كان فظيع
ياسين يا بابا.. ياسين ابني فين؟ طارق هدّدني بيه.. قالي لو اتكلمتي أو طلبتي الطلاق هسفره برا مصر ومش هتشوفيه تاني، وسميحة كانت بتديني الحقن بالعافية وتقولي إنتي غير متزنة ومحدش هيصدقك..
فتحي ضغط على إيدها بقوة، صوته كان حاسم يطمن أي خوف في الدنيا
ياسين في حضني وفي أمان. وحيد الرشيدي خلص أمر تسليم الصغير بأمر وقتي من قاضي الأمور الوقتية في محكمة الأسرة، والولد دلوقتي مع الدادة وخالتك في بيتي في شبرا، بيضحك وبيلعب وكلها ساعات وتروحيله. مفيش مخلوق على وش الأرض يقدر يمس شعرة من ابنك وانتي في ضهرك فتحي الصاوي.
مريم بصت لأبوها بذهول ممزوج بالخوف
أبويا.. طارق معاه نفوذ.. وعيلته مش سهلة، دول هيأذوك وهيجرجروك في المحاكم وأنت راجل كبير مش حمل بهدلة القسم والمستشفيات..
فتحي ابتسم نص ابتسامة هادية، وعدل السديري بتاعه
نفوذ مين يا مريم؟ اللي معاه ربنا ومعاه الحق والقرش النضيف مبيخافش من عيال ورق. اسمعيني يا بنتي.. زمان سيبتك تروحي باختيارك عشان كنت فاكر إن ابن الأصول بيبان من كلمته، ودلوقتي جه الوقت اللي تعرفي فيه مين هو أبوكي الحقيقي. أنتي بنتي ووريثتي الوحيدة، ومن النهاردة مفيش حزن ولا خوف.. النهاردة هنعلم عيلة الديب الأدب اللي أهلهم معرفوش يعلمهولهم.
على الساعة تلاتة العصر، دخل المستشار وحيد الرشيدي أوضة الرعاية الخاصة ومعاه أربع محامين تانيين شايلين دوسيهات جلد زرقا وحمرا.
وحيد وقف باحترام قدام فتحي
يا باشا، النيابة باشرت التحقيق مع طارق الديب. الواد منهار تماماً واعترف في التحقيقات الأولية بمكان الدكتور اللي كان بيجيب منه المهدئات بدون تذكرة طبية، والدكتور اتقبض عليه في عيادته في مصر الجديدة واعترف إنه خد رشوة 50 ألف جنيه عشان يزوّر تقارير نفسية تدّعي إن مدام مريم عندها فصام واضطراب وجداني حاد وميول انتحارية.
فتحي عينه برقت
والدكتور ده اتسجلت اعترافاته رسمي؟
رسمي يا فندم، التهم اتثبتت شروع في إيذاء جسيم، تزوير محررات رسمية، واحتجاز وتعذيب، وجناية تداول واستخدام مواد محظورة. وكيل النيابة أمر بحبس طارق أربعة أيام على ذمة التحقيق مع التجديد في الميعاد، ومنعه من السفر هو وأمه سميحة.
فتحي هز راسه ببطء، ولف وشه لمريم اللي كانت بتسمع كل كلمة وعينيها مبرقة من هول المؤامرة اللي كانت بتتحاك ضدها وضد عقلها وحياتها
شوفتي يا بنتي؟ كانوا بيخططوا يدخلوكي مستشفى الأمراض النفسية رسمي وياخدوا هما الوصاية عليكي وعلى ابنك عشان يضمنوا إنك متفتحيش بؤك باللي بيعملوه. لكن ربك يمهل ولا يهمل.
التفت فتحي لوحيد وقال بنبرة أوامر عسكرية
الخطوة التانية يا وحيد. شركات الشحن والتخليص الجمركي بتاعتهم.. موقفها إيه؟
وحيد طلع ملف أحمر سميك
عيلة الديب داخلة في شراكة لتوريد قطع غيار سيارات ومعدات ثقيلة لمشروع قومي كبير في العاصمة الإدارية، والشحنة الأساسية اللي قيمتها 120 مليون جنيه واصلة مينا العين السخنة الليلة. هما كانوا دافعين 10 بس وواخدين تسهيلات ائتمانية من بنك التنمية بضمان الفيلا والمصنع. وبما إننا استحوذنا على مديونية البنك والحجز التحفظي نزل على كل أصولهم، فالشحنة مش هتخرج من المينا، والغرامات اليومية للتأخير هتبتدي تعد من بكرة الصبح بمعدل نص مليون جنيه في اليوم، والشرط الجزائي مع شركة العاصمة الإدارية هيفعل بعد 48 ساعة بفسخ العقد ومصادرة خطابات الضمان!
فتحي قام وقف، قرب من الشباك وبص على شوارع التجمع من فوق، ملامح وشه كانت مرسومة بصرامة راجل عرك الدنيا وفهم كل مفاصلها
تتصل بمدير إدارة المواني وجمارك السخنة.. تطبق القانون بحذافيره. مفيش مسمار يخرج من غير تسوية الحسابات القديمة كاملة وفك الحجز القضائي، وطبعاً الحجز مش هيتفك لأنهم ممعهمش مليم أحمر يسددوا بيه.
وحيد ابتسم
يعني إفلاس تجاري رسمي وتصفية قضائية لكل ممتلكات العيلة.
فتحي
وأكتر من كده. سميحة هانم اللي كانت بتقولي يا راجل يا بتاع شبرا.. عايزها تدوق معنى المرمطة اللي عاشتها بنتي. كل جمعية خيرية كانت بتترأسها، وكل نادي كانت بتدخل تتمنظر فيه بفلوس القروض والديون، يتعرف حقيقتهم بالورق والمستندات القانونية. عايز الفضيحة تدق في كل ركن هما اتعالو بيه على الغلابة.
في قسم الشرطة، كان طارق قاعد في الحجز المنفرد، هدومه الماركة متبهدلة، برفانه اختلط بريحة الرطوبة وعرق المحتجزين، وشه كان مليان كدمات بعد ما حاول يعمل مشكلة على الحرس واتكتف.
الباب اتفتح ودخل عسكري
يا طارق، محاميك مستنيك في أوضة الزيارة ومعاه والدتك.
طارق جرى زي المجنون على أوضة الزيارة، لقى سميحة قاعدة وشعرها منكوش وبتعيط بانهيار، وجنبها محامي الشركة القديم اللي وشه كان بيقطع الخميرة من البيت.
طارق مسك إيد أمه من ورا السلك
أمي! هخرج امتى؟ كلمتي خالو؟ كلمتي المستشار؟! المحضر ده لازم يتلغي النهاردة! أنا هموت هنا!
المحامي رفع إيده بقلة حيلة وصوت واطي
اهدا يا طارق بيه.. الوضع أسوأ بكتير مما تتخيل. فتحي الصاوي طلع حوت.. حوت كبير أوي ومغطي نفسه بشبكة قانونية معقدة. الراجل اشترى كل شيكاتك والكمبيالات، وعنده تسجيلات من كاميرات مراقبة وتليفونات بنته متفرغة بأمر النيابة، وتقرير الطب الشرعي نزل وثبت فيه نسبة المهدئات العالية في دم مريم وآثار التعذيب والأذى. التهمة اترفعت لجناية شروع في إيذاء جسيم وتزوير، والقاضي في جلسة التجديد رفض إخلاء السبيل بأي كفالة.
سميحة صوتها طلع مسرسع ومتقطع
والمصنع يا متر؟ والفيلا؟! أنا نايمة عند أختي في المعادي ومش قادرة أرفع عيني في عين حد من قرايبنا! الكل عرف، وجروبات التجمع وكل معارفنا في النادي منزلين صور الشمع الأحمر اللي على باب الفيلا!
المحامي هز راسه بأسى
