رمضان أخويا قفل التليفون ببطء، وشاورلي بإيده إني مطلعش نَفَس. شدني من إيدي ودخلني الأوضة الجوانية اللي بتبص على منور البيت، وشال يوسف وسيف وحطهم جوة الدولاب القديم، ووشوشهم بصوت حازم
حبايب خالو… مفيش نفس يخرج من بؤكم، ولا صوت عياط مهما سمعتوا برا، سامعين؟
العيال هزوا راسهم برعب، والدموع محبوسة في عينيهم. قفلنا ضلفة الدولاب وسيبنا شق رفيع يدخلهم هوا.
لف رمضان ناحيتي، عيونه كانت بتلمع في الضلمة زي الصقر، ومد إيده ورا الباب وطلع شومة تقيلة وحديدة من بتاعة تصليح العربيات
خدي دي في إيدك يا ندى، ومهما حصل متخرجيش من الأوضة إلا لما أناديكي.. الحساب بتاع السنين دي كلها هيتصفى الليلة، وعليا النعمة ما هخليهم يلمسوا شعرة منك ولا من عيالك تاني!
رمضان.. دول تلاتة ومعاهم سلاح وناس مسلحة، متقفش قدامهم لوحدك، اتصل بالشرطة!
التليفون مفيش فيه شبكة من ساعة ما الكهربا قطعت.. بس ولاد بلدنا مبيسبوش حقهم، وأنا عارف إزاي أربيهم.
وفجأة… صوت ركلة عنيفة هزت باب الشقة الخارجي، ووراها صوت تكسير القفل بالعتلة!
الباب اتفتح بصرير مرعب، وصوت خطوات تقيلة دخلت الصالة، ومعاها نور كشافات موبايل بتلف في الزوايا. صوت إبراهيم كان باين فيه السكر والغل
اطلعي يا ندى! اطلعي يا شاطرة هاتي الورق اللي سرقتيه من أبونا، بدل ما نحرق البيت ده باللي فيه زي ما عملنا في شقتك!
وصوت محمود جوزي، اللي كان دايماً عامل نفسه غلبان، طلع فحيحه في الضلمة
اطلعي وريحينا يا ندى.. كفاية لحد كده، ضيعتونا وفضحتونا في المركز كله، الورقة دي لو مرجعتش الليلة كلنا ميتين، فمش هتفرق معانا نموتك إنتي كمان!
في اللحظة دي، رمضان زق باب الأوضة وخرج عليهم زي الطوفان في الصالة، الشومة نزلت على أول واحد فيهم طيرت الكشاف من إيده وصرخة وجع ملت المكان
أهلاً بالندل وأهله! مفكرين بيت أبوها ملوش رجالة يحموها؟!
المواجهة اشتعلت في الصالة في عز الضلمة، صوت الدب والتكسير كان بيهز الجدران، محمود وإبراهيم هجموا على رمضان، بس رمضان كان بيضرب بغل سنين من القهر، كسر رجل إبراهيم بالشومة لحد ما وقع يصرخ في الأرض.
بس محمود كان غدار.. سحب مطواة قرن غزال من جيبه وكان بيقرب من ضهر رمضان وهو مش واخد باله في العتمة!
النار ولعت في نافوخي.. شوفت اللحظة اللي جوزي ناوي يغدر فيها بأخويا اللي حماني، واللحظات دي مفيهاش تردد. خرجت من الأوضة وجريت بكل سرعتي، وبحديدة التصليح اللي في إيدي ضربت محمود على كتفه ودراعه اللي ماسك المطواة بكل عزمي.
المطواة طارت في الهوا، ومحمود صرخ ومسك دراعه ووقع على الكنبة المتهالكة وهو بيتألم، بصلي بعيون مليانة حقد وذهول
إنتي يا بت الك… بتضربيني أنا؟!
وأقطع رقبتك لو فكرت تقرب من أهلي أو عيالي تاني! إنت انتهيت يا محمود، كلكوا انتهيتوا!
في ثواني معدودة، صوت سارينات عربيات الشرطة ملت الشارع تحت، وأنوار البوكسات الحمرا والزرقة كانت بتضرب في شبابيك الصالة، وصوت شباب الحارة وأهل البلد كان طالع على السلم يجروا بعصيان ونبابيت بعد ما المحامي كان مبلغ النجدة ومحرك أهل المنطقة وراهم أول ما عرفوا طريق هروبهم.
الباب اتكسر ودخلت قوة المباحث بالأسلحة، والظابط شاور للعساكر
كلبش الكلاب دول! الاتنين الهربانين والتالت قاطع الطريق!
محمود وإبراهيم اتكتفوا في الأرض، الكلبشات اتقفلت على إيديهم بعنف، ومحمود كان وشه في تراب الأرض وبيبصلي بكسرة وذل عمره ما عاشهم، وحمايا كان مسكوه تحت في العربية وهو بيراقب السكة.
الظابط بصلي وقال
الحمد لله على سلامتكم يا ست ندى.. المحضر كامل، وجناية الهروب مع الشروع في الإيذاء والحريق العمد والتلاعب هتخليهم يقضوا سنين عمرهم ورا القضبان، حقك وحق عيالك رجع بالقانون.
خرجوا يجروا فيهم على السلم وسط تفييل وشتيمة من أهل المنطقة كلهم، ومحمود بيبصلي لآخر مرة وهو نازل وعينه كلها دموع ندم متأخر ملوش أي تمن.
رجعت الأوضة، فتحت ضلفة الدولاب، يوسف وسيف ارتموا في حضني، عياطهم كان بيرجف في ضلوعي، بس كان عياط الخلاص.
ضميتهم لصدري وبوست راسهم
خلاص يا حبايبي.. الغمة انزاحت، مفيش خوف تاني، ومفيش جوع ولا قهر تاني.
بعد مرور ست شهور…
