لا يا أمي! ما تلبسينيش أنا المصيبة! انتي اللي قولتيل هديتي حيلك وسحبتيني من إيدي وقولتيلي أطلع بالراحة قبل ما هي ترجع! أنا مش هشيل ذنبك ولا هسكت، انتي اللي عاوزة تخربي بيت أخويا!
حماتي هجمت على ابنها وكانت هتضربه وهي بتصرخ
اخرس يا قليل الأدب يا قليل الأصل! انت اتجننت ولا عتلك حتة بعقلك؟! بتبيع أمك عشان خاطر واحدة غريبة؟!
مسكتها من دراعها وزقيتها لورا بقوة ما عرفتش جبتها منين، ووقفت بينها وبين ابنها وقلت بصوت زي الرعد
مش هتحركوا من هنا! ولا كلمة تانية! انتوا الاتنين هتفضلوا واقفين مكانكم لحد ما ابنك الكبير ييجي يشوف الوساخة اللي عايش فيها! قسمًا بالله لو حد فيكم اتنقل خطوة واحدة برة الباب ده لألم عليكم الشارع وأجيب الشرطة!
الوقت كان بيمشي زي السلاح، عشر دقايق مرت وكأنها دهور. وفجأة، اتفتح باب الشقة باندفاع رهيب. دخل أحمد جوزي وهو بينهد ونفسه مقطوع، وشه كان شاحب وزي ما يكون جرى المسافة كلها من شغله لحد البيت. بص للزحمة والصريخ، وشفني واقفة بترعش وعلاء بيبكي في الأرض وأمه واقفة وشها زي الدم.
أحمد بصلي بذهول وخوف وقال
في إيه يا نورا؟! فيه إيه يا جماعة؟! انتي قلقتيني وجيت بدم قلبي في الطريق.. فيه إيه اتقال عشان تطلبي الطلاق كده؟!
شاورْت على أمه وأخوه، وقلت له ونبرتي مليانة احتقار ومرارة
اسأل الست الوالدة! اسأل الحنيّنة اللي طول عمرك بتقولي استحمليها عشان خاطري! اسألها ليه باعتة أخوك الصغير، اللي عنده 19 سنة، يدخل أوضة نومنا في غيابك، ويفتح دولابي ويطلع هدومي الخاصة! اسألها كان بياخد هدومي ليه؟!
أحمد اتسمر في مكانه، وبص لأخوه ولأمه بصدمة مش قادر يستوعبها، وقال بنبرة مرعوبة
علاء؟! الكلام ده صح؟! انت دخلت أوضة نوم أخوك وفتاشت في دولاب مراته؟! أنت اتجننت يا علاء؟!
علاء قام وقفه وهو بينحب
يا أحمد والله أمي هي اللي قالتلي! قالتلي استغل إن نورا عند أهلها وأحمد في الشغل، واطلع هات قطعة من هدومها عشان أروح بيها لشخص يعمل عمل تفريق ونخلص منها! هي اللي أجبرتني وقالتلي لو مفرقتش بينكم مش هكون راضية عنك!
أحمد لف لأمه بطريقة مرعبة، وشه اتحول من الصدمة للغضب الذهول، وبص لها وهو مش مصدق
أمي؟! الكلام ده حقيقي؟! انتي تبعتي علاء يفتش في هدوم مراتي الخاصة عشان تعمليلها عمل؟! انتي تدخلي حرمة أوضتي بالأسلوب ده؟!
حماتي بدأت تتلجلج وتوترها بقى واضح للكل، بس حاولت تكابر وتزعق
يا أحمد متصدقش العيل ده! الواد خايف منها فبيخرف! أنا أعمل كده يا ابن بطني؟! أنا عاوزة مصلحتك، البنت دي هي اللي مالية رأسك ومغيرك علينا، والواد كان طالع…
أحمد صرخ فيها بصوت أول مرة أسمعه في حياتي، صوت هز الشقة كلها وخلّى أمه تتخرس في مكانها
بسسسس! كفاية كذب وتضليل! علاء مش هيتبلى عليكي في حاجة زي دي! بقا القسوة والغل يوصلوا بيكي إنك تتعدي على حرمة بيتي وأوضة نومي؟! استأمنتك على بيتي ومراتي، تقوم استغلي غيابي وتبعتي أخويا يعمل العملة السودة دي؟!
أحمد أخد نفس عميق، ودموعه نزلت من الخيبة والصدمة في أمه. بصلي ولقى الشنطة اللي كنت لميت فيها حاجتي السريعة محطوطة جنبه، ولقى نظرة القرف والرفض في عينيا، نظرة بتقول إن لو السماء انطبقت على الأرض مش هقعد في البيت ده ثانية واحدة.
قرب مني وهو بيترجاني بصوت مكسور
نورا.. أنا آسف، والله العظيم ما أعرف، أنا بحبك ومقدرش أستغنى عنكي، حقك عليا أنا هجيبلك حقك من الكل وهنقل من البيت ده خالص…
قطعت كلامه بجمود وقسوة
الكلام ده كان ينفع زمان يا أحمد.. لما كانت بتستكتني وتسممني بالكلام وكنت بقول عشان خاطرك. لكن لما الموضوع يوصل لأوضة نومي وهدومي والأعمال دي، يبقى مفيش خط رجعة. لو باقي على الحبيبة أو الذكرى اللي بيننا، طلقني بالإحسان وبلاش تدخلنا في قضايا ومحاكم، لأن لو فضلت على ذمتك دقيقة واحدة كمان، أنا هروح أعمل بلاغ رسمي بالتعدي والدجل وشروع في إلحاق الضرر، وهسجن أمك وأخوك
أحمد بص لأمه بغل ملوش مثيل، وبعدين بصلي وهو حاسس بالعجز والكسرة. عرف إن الكسر اللي حصل في قلبي وفي كرامتي أعمق من إن أي اعتذار يداويه في لحظتها، وإن بقائي في البيت ده ولو لدقيقة واحدة مع الست دي بقى شيء مستحيل.
بص لأمه وقالها بصوت جاف ومكسور
رضيتي كده؟ ارتحتي لما خربتي بيتي بجهلك وغلك؟ أقسم بالله يا أمي لو نورا سابتني أو جرى لبيتي حاجة، لا أنتي أمي ولا أعرفك بعد النهاردة!
مسكت شنطتي فوراً ومشيت من غير ما ألتفت ورايا، وسبت صريخهم وزعيقهم يرن في البيت كله. رجعت بيت أهلي وأنا بتفض من الصدمة، حكيت لأمي وأخويا على كل اللي حصل، ومحدش فيهم صدق إن الوساخة والغل يوصلوا بيها للدرجة دي. أهلي وقفوا جنبي وضهري، وحرموا على أحمد يدخل البيت أو يكلمني.
على مدار ست شهور، أحمد مكانش بيبطل محاولات. كان بييجي تحت بيت أهلي كل يوم، يتصل بأخويا وبيحايل في أمي، بعت قرايبه وناسينه عشان يتأسفوا ويترجوني أرجع. كان عياطه ورسائله اللي بيبعتها كل ليلة بتقول إنه ملوش ذنب وإنه مستعد يعمل أي حاجة في الدنيا عشان يعوضني ويحميني، بس أنا كنت قافلة الباب تماماً ورافضة أرجع لبيت العيلة ده لو على رقبتي.
