وقف إسلام يفرك في رجليه ومحروج
يا ماما.. مكناش متفقين على كده، وميّ راجعة من الوردية وتعبانة مش قادرة.
لوت نادية شفايفها بقمصة
تعبانة إيه بعد الشر عليها، هترتاح بعدين! دي ليلتي واحتفالي، هو أنا ماليش نفس أفرح مرة كل كام سنة؟ ده أنتوا عيالي يعني مش حد غريب!
جرس الباب رن.
رنة طويلة ومستعجلة.
وش نادية نور ونزلت تسقيف بإيديها
أهو الدليفري جه!
بصت لميّ بأمر
ميّ، افتحي الباب يا حبيبتي واستلمي الأكل براحة ورصيه في الأطباق.
راحت ميّ ناحية الباب وفتحته ببطء.
مكنتش مستعجلة، كانت عايزة تشوف الفيلم ده آخره إيه وحماتها نيتها توصل لحد فين.
فتحت الباب، لقت دليفري لابس يونيفورم شيك عليه لوجو مطعم كبابجي ومشويات من الأغلى في التجمع، مطعم ميّ وإسلام نفسهم مكنوش يقدروا يدخلوه حتى في عيد جوازهم.
قدام رجلين الدليفري كان في تلات شنط كبار من العازلة للحرارة.
أوردر مشويات ومقبلات وطواجن وسلاطات من المطعم يا فندم، شقة 42؟
أيوة. هزت ميّ راسها.
الحساب مع الاستلام يا فندم.
طلع الدليفري ماكينة الفيزا من جيبه
المطلوب 24 ألف و جنيه.. كاش ولا فيزا؟
الرقم نزل في الصالة يرن زي القنبلة.
أربعة وعشرين ألف وتمنمية جنيه.
يعني شقا كام شهر من شغلها في المطبعة والوقفة على رجلها بالساعات.
طلعت نادية ورا ميّ على طول في المدخل، وبنبرة مايعة وصوت ناعم فجأة
اتأخرتي ليه كده يا حبيبتي؟
بصتلها نادية وغمزت
يلا ادفعيله بالفيزا بتاعتك ودخلي الأكل المطبخ عشان نلحق نغرفه في السرافيس قبل ما يبرد وصاحباتي يوصلوا…
ميّ فضلت واقفة مكانها زي الصنم، عينيها اتحولت من مكنة الفيزا اللي في إيد الولد الدليفري لوش حماتها اللي كان بينضح برود وتبجح مش طبيعي. نادية كانت واقفة وراها مباشرة، حاطة إيد على وسطها والإيد التانية بتعدل بيها خصلة من شعرها المصبوغ، وبتوزع ابتسامات كأنها بتعمل في ميّ جميلة العمر إنها سمحتلها تدفع الحساب.
إيه يا ميّ؟ متنحة كده ليه يا بنتي؟ طلعي الكارت من الشنطة يلا عشان الشاب واقف على السلم والريحة ملت العمارة وصاحباتي على وصول! قالتها نادية بصوت فيه نبرة استعجال فجة، كأنها بتأمر شغالة عندها في البيت.
ميّ لفت وشها ببطء شديد، وبصت في عين حماتها مباشرة، صوتها كان هادي أوي، هدوء يرعب، الهدوء اللي بيسبق الطوفان أدفع منين يا طنط؟
ضحكت نادية ضحكة رقيعة مسموعة وهي بتبص للولد الدليفري كأنها بتهزر منين إيه يا بت بطلي حركاتك دي! من الفيزا بتاعتك يا حبيبتي، هو إحنا غرب؟ إنتي زي بنتي بالظبط والبيت بيتك والأكل ده هناكل منه سوا.. مش وقته الشحاتة دي دلوقتي قدام الغريب، عيب!
في اللحظة دي، فريد حماها طلع من المطبخ وفي إيده خيارة مقرمش نصها، لابس شبشب البيت وبكرشه المدلدل، ومشي ناحية الباب وهو بيشمشم في الهوا زي اللي شم ريحة صيد الله أكبر! إيه ده؟ كباب وكفتة وريش ضاني وطرب؟ والله تسلم إيدك يا نادية يا حبيبتي، ده أنتوا هتهيصوا النهاردة.. افتحي يا ميّ افتحي الشنط خلينا ندوق كفتة المطعم ده بيقولوا عليها حكاية، وادفعي للراجل خليه يتوكل على الله الجو حر على السلم.
ميّ حست بدمها كله بيفور، بس وشها متحركش فيه عصب واحد. بصت للولد الدليفري اللي كان باين عليه الإحراج الشديد وبدأ يبص في الأرض من الموقف، وقالتله بصوت واضح سمعه التلاتة معلش يا كابتن، الأوردر ده مش بتاعي، ومحدش هنا هيدفع مليم من معاه غير اللي طلبه. الحساب مع الست الوالدة اهي، هي اللي عزماك وهي اللي طالبة.
وش نادية جاب ألوان، الابتسامة الصفرا اختفت فجأة وحلت مكانها نظرة شرسة، عينيها ضيقت وقربت خطوة من ميّ ونزلت صوتها لفحيح أفعى إنتي اتجننتي في عقلك يا بت إنتي ولا إيه؟ أنتي هتعمليلي نمرة قدام عيل دليفري على السلم؟ بقولك هاتي الكارت وادفعي، بعدين نبقى نتحاسب، متبقيش فقرية كده وتقطعي بيا قدام صاحباتي!
نتحاسب بعدين؟ ميّ سألتها ببرود وهي بترفع حاجبها نتحاسب زي ما اتحاسبنا على لحمة امبارح اللي كانت تكفيني أسبوع وكلتوها؟ ولا نتحاسب على خضار الأسبوع اللي فات؟ طنط نادية، أنا في حسابي كله 842 جنيه، تمن تلاتة كيلو طماطم وفرخة، انتي طالبة أكل ب 25 ألف جنيه! يعني مرتبي بتاع تلات شهور شقا في المطبعة ووقفة على رجلي بالساعات.. أدفعهم منين؟ أبيع كليتي عشان صاحباتك ياكلوا كباب وطرب على قفايا؟
اللي بقت على باب الشقة.
في إيه يا جماعة؟ صوتكم واصل لآخر الشارع، عيب كده الجيران هتتفرج علينا! قالها إسلام وهو بيبص لأمه بخوف، ومتحاشي تمامًا يبص في عين ميّ.
نادية أول ما شافته، قلبت الآية في ثانية، عينيها دمعت بمهارة ممثلة قديمة ومسكت في صدرها كأن جالها أزمة قلبية تعالى يا إسلام.. تعالى شوف مراتك بتعمل في أمك إيه! بتهزأني قدام الغريب، وبتقولي بتاكلي أكلنا وطافحة لحمتنا! الست هانم مش راضية تستلم العشا بتاعي وعايزة تصغرني قدام شلتي وصاحباتي اللي زمانهم طالعين على السلم! يرضيك أمك تتبهدل البهدلة دي في بيتك وتحت سقفك؟ يرضيك تصغرني عشان حتة ورقة فيزا؟
فريد دخل في الخط وهو بيزعق ويمضغ بقية الخيارة إيه قلة الأدب دي يا إسلام؟ إنت مش عارف تحكم بيتك ولا إيه يا واد؟ الست هانم صوتها طالع على أمك وعليا عشان أكلنا طبق طبيخ بايت؟ ما تطلع الفيزا بتاعتك يا ابني وادفع للراجل وخلصنا من المسخرة دي!
إسلام بلع ريقه بصعوبة، وشه احمر من الكسوف وبص للأرض يا بابا.. أنا.. أنا الفيزا بتاعتي مفهاش غير ألفين جنيه يدوب مكملين لآخر الشهر.. ممعيش المبلغ ده كله.
نادية بصت لابنها بصدمة، وبعدين لفت وشها لميّ وشرار الغل بيطلع من عينيها يبقى تدفع هي! ما هي بتشتغل وبتقبض وشايلة فلوسها تحت البلاطة، ماهي لو كانت بنت أصول بجد مكنتش خلت جوزها يتحط في الموقف ده! هاتي الكارت يا ميّ وبطلي دلع، الفلوس بتروح وتيجي، إنما كرامة بيتنا قدام الناس متتبعش برخيص!
الولد الدليفري كان بدأ يتململ، بص في ساعته وقال بصوت واطي ومحرج يا جماعة لو سمحتوا، أنا ورايا أوردرات تانية والوقت بيعدي، هتدفعوا ولا ألغي الأوردر وأرجع بيه المطعم؟ بس لو رجعت بيه هيتسجل عليكم بلاك ليست ومش هتعرفوا تطلبوا منه تاني.
