
فتحت الظرف وإيدي بتترعش، ونبضات قلبي بقت مسموعة في ودني زي دقات الساعة. سحبت الورقة اللي جوه، وكانت مكتوبة بخط إيد ملخبط، كأن اللي كاتبها كان مستعجل أو خايف. عيني جت على السطور الأولى، والدم اتجمد في عروقي
أنا عارف كل حاجة حصلت معاكي… وعارف الندل اللي ضحك عليكي وسابك. متخافيش مني، أنا مش جاي أبتزك ولا جاي أئذيكي… أنا جاي أصلح غلطة ملهاش ذنب فيها غير طيبة قلبك وثقتك في حد مبيسواش. بكره الساعة 5 بعد العصر، استنيني في الكافيه اللي جنبك… هكون قاعد مستنيكي، ولازم تيجي عشان مصلحتك.
الورقة وقعت من إيدي على الأرض. قعدت على السرير وركبي مش شايلاني. مين ده؟ وعرف منين؟ هل هو واحد تبع إسلام؟وده كان اسمه اللي كنت بحاول أمسحه من ذاكرتيولا حد من الجيران شاف حاجة؟ الأفكار بدأت تروح وتيجي في دماغي زي الإعصار. خوفت… خوفت أوي. حسيت إن الماضي اللي هربت منه
ودفنته في صلاتي ودموعي قايم يجرّي ورايا وعايز يهد كل خطوة مشيتها عشان أقف على رجلي تاني.
مواجهة الخوف
طول الليل منمتش. كنت ببص للسقف وبفكر أروح ولا ماروحش؟ لو مروحتش، ممكن ييجي لحد باب الشقة ويفضحني، ولو روحت، ممكن أكون برمي نفسي في مصيدة جديدة. بس افتكرت إني مبقتش البنت الضعيفة بتاعة زمان. أنا عديت بالأسوأ، ومبقاش عندي حاجة أخسرها غير كرامتي اللي بحارب عشان أحميها.
تاني يوم، الساعة جت 5 إلا خمسة. لبست هدومي، ونزلت. خطوت كانت تقيلة، بس كان فيها ثبات غريب أول مرة أحس بيه. دخلت الكافيه، وبدأت عيني تدور في المكان. مكنش فيه زحمة. في ركن بعيد، كان قاعد شاب، شكله ملامحه هادية، ولابس قميص أسود، أول ما عيني جت في عينه، وقف وشاورلي.
مشيت ناحيته وأنا بحاول أجمع كل شجاعتي. قعدت من غير ما أقول كلمة، وبصيتله بنظرة كلها تحدي وخوف في نفس الوقت.
قولتله بصوت بس قوي
أنا جيت… إنت مين؟ وعايز مني إيه؟ وعرفتي منين اللي كتبته في الورقة؟
تنهد وبص في الأرض لحظة، وبعدين بصلي وقال بنبرة فيها أسف حقيقي
أنا اسمي أحمد… وأنا أبقى ابن عم إسلام.
الحقيقة
أول ما نطق اسمه، حسيت إني عايزة أقوم أجري. جسمي كله ساب. أحمد لاحظ ده، فمد
إيده بسرعة وقال
أرجوكي متخافيش واقعدي واسمعيني. إسلام مش هنا، وميعرفش إني بكلمك. إسلام عمل من أسبوعين… وحالته وهو دلوقتي بين الحيا والموت في المستشفى.
سكت ثانية، وكمل وصوته بيترعش
هو في غيبوبة، بس قبل ما يدخل فيها، لما الدكتور قاله إن حالته حرجة وممكن ميعيش، قعد يعيط زي العيال. كان مرعوب من ربنا… وقالي يا أحمد، أنا ظلمت بنت يتيمة واستغليت وحدتها وكسرتها… أنا بموت عشان ذنبها. قالي على عنوانك، وقالي أدور عليكي وأطلب منك تسامحيه، واداني الورقة دي… دي رسالة منه ليكي، كتبها وهو
أحمد طلع ورقة تانية من جيبه وحطها قدامي. كانت ورقة من دفتر مستشفى، ومكتوب فيها بخط مهزوز جداً
أنا آسف… أنا عارف إن الأسف مش هيصلح اللي ، بس أنا وخايف من ربنا. سامحيني يا نور… سامحيني عشان أقدر مرتاح.
صراع النفس والعدالة الإلهية
فضلت باصة للورقة والدموع نازلة من عيني زي المطر. بس المرة دي مكنتش دموع ضعف… كانت دموع صدمة وذهول. ربنا جابلي حقي؟ ربنا مسبنيش؟ الشخص اللي كسرني وداس على كرامتي وضحك عليا، واقف دلوقتي عاجز قدام ربنا وبيترجى سماحي؟
أحمد بصلي وقال
يا نور… أنا مش جاي أدافع عنه، إسلام غلط وغلطه كبير وميتغفرش بسهولة. بس أنا شوفتك وعرفت من كلامه وعيونك دلوقتي إنك بنت بنوت، محترمة، ومالكيش ذنب. أنا جيت أقولك إن ربنا مبيرضاش بالظلم، وإن حقك رجعلك لحد عندك. وبصراحة… أنا جيت كمان عشان حاجة تانية.
بصيتله باستغراب ومسحت دموعي
حاجة تانية إيه؟
أحمد سكت شوية، كأنه بيرتب كلامه، وبعدين قال
أنا دكتور نسا وتوليد يا نور… وإسلام حكالي عن كل مخاوفك وعن الوجع اللي عايشة فيه وعن خطوتك اللي خايفة تخديها. أنا مستعد أساعدك… مش عشان إسلام، عشانك إنتِ. عشان ترجعي تعيشي حياتك وتتجوزي وتفتحي بيت ومن غير ما تعملي عمليات ولا تكدبي على حد. أنا هكتبلك تقرير طبي يثبت حالتك الطبية الحقيقية اللي مفيش فيها أي عيب، لأن اللي حصل معاكي… مغيرش حقيقتك ولا شرفك في عين اللي بيفهم.
بداية جديدة
حسيت إن طاقة نور اتفتحتلي من السما. الدنيا لفت بيا، بس المرة دي لفت بالفرحة والراحة اللي مكنتش دوقتهما من سنين. قومت وقفت، وبصيت لأحمد وقولتله
قول لإسلام… إن ربنا هو اللي بيحاسب. وأنا خلاص، مبقتش زعلانة ولا بقيت خايفة. أنا هسيب حسابه لربنا… وشكراً ليك يا دكتور.
سيبته ومشيت… خرجت للشارع والهوا بيخبط في وشي. لأول مرة من سنين أحس إني قادرة أتنفس بجد. بردت ناري، وراحت الغمة اللي كانت كاتمة على نفسي. عرفت إن اليتيم ملهوش غير ربنا، وإن اللي بيسلم حموله لله، عمره ما بيضيع.
رجعت شقتي، قفلت الباب، بس المرة دي مسمعتش صوت السكوت الموحش… سمعت صوت الأمل وهو بيملا كل ركن في المكان. بصيت في المراية، وابتسمت للبنت اللي واقفة قدامي، وقولتلها إنتِ كسبتي… وحياتك لسه بتبدأ النهارده.
عدت الشهور بعد اليوم ده، وكان كل يوم بيمر عليا بحس فيه إن في حمل دبل اتزاح من على كتافي. الدكتور أحمد وفي بوعده، مش بس ساعدني من الناحية الطبية وفهمني إن الخوف اللي جوايا كان وهم زرعه إسلام في دماغي عشان يفضل كاسرني، لأ.. ده كمان فضل يسأل عليا من بعيد لبعيد كأنه بيطمن إن البنت اللي كانت هتموت من الرعب دي رجعت تعيش تاني.
أما إسلام… فعرفت بعد خطوبتي بفترة إنه اتوفى في المستشفى بعد ما الغيبوبة طولت معاه. لما جالي الخبر، مقدرتش أظلم نفسي وأقول إني زعلت، ومقدرتش برضه أشمت. كل اللي عملته إني قعدت على سجادتي وقولت يا رب، إنت العدل، وإنت اللي جبتلي حقي وأنا قاعدة في مكاني… أنا مسامحة في حقي العبد، وسيبالك حقي اللي عندك. حسيت بسلام غريب مكنتش دوقته من يوم ما وعيت على الدنيا.
خطوة جديدة.. وخوف قديم
والوقت بيجري. ربنا كرمني في شغلي، وبقيت ماسكة بوزيشن كويس في الشاركة اللي شغال فيها. مبقتش نور الضعيفة اللي بتستخبى من عيون الناس؛ بقيت بنت ب ميت راجل، واثقة في خطوتها، ولبسي ومظهري وكل حاجة فيا اتغيرت. بس الفكرة اللي كانت دايماً بتطاردني هل هفضل لوحدي طول عمري؟ هل هيفضل الباب المقفول عليا آخر اليوم هو مصيري؟
لحد ما جه مصطفى.
مصطفى كان مهندس جديد دخل الشاركة معانا. من أول يوم، كان فيه حاجة مختلفة. راجل هادي، محترم، عينه تملى المكان ومليان رجولة وأصل. كان بيتعامل معايا بحدود، بس عيونه كانت بتقول كلام تاني خالص. كان كل ما يشوفني داخلة، يقف يرحب بيا، ولو غبت يوم عن الشغل، ألاقي ريكورد منه على الواتساب أنسة نور، خير.. عسى المانع خير؟ الشغل ناقصه وجودك النهارده.
حصري على صفحة روايات و اقتباسات…
كنت بهرب من نظراته. كنت بقول لنفسي أوعي يا نور.. أوعي تقعي تاني. إنتِ صدقتي فوقتي؟ الرجال كلهم صنف واحد. بس مصطفى مكنش زي إسلام. مكنش بتاع كلام معسول في الضلمة، ولا كان بيحاول يستغل لحظة ضعف. كان بيثبتلي كل يوم بأفعاله إنه راجل بجد. لما كنت أقع في مشكلة في الحسابات، كان يسيب مكتبه ويقعد معايا بالساعات يفهمني بالراحة ومن غير ما يحسسني إني مش فاهمة.
وفي
يوم.. بعد ما الشغل خلص والكل مشي، لقيت مصطفى واقف مستنيني برا الشاركة. الجو كان مغيم وساقعة، وبصلي وقال بنبرة رجولة تخلي أي بنت تطمن
أنسة نور.. أنا مش من بتاع اللف والدوران، وأظن إنتِ ذكية وملاحظة. أنا شاريكي.. شاري أصلك وأدبك وشغلك. وعايز أطلب إيدك. بس أنا عرفت إنك عايشة لوحدك ووالدك ووالدتك متوفيين، الله يرحمهم. فكنت عايز أعرف.. أكلم مين؟ ومين كبيرك اللي أتشرف وأقعد معاه؟
الكلمة نزلت عليا زي الصاعقة. مين كبيرك؟ الكلمة دي وجعتني وفتحت في قلبي جرح قديم. أنا ماليش حد.. ماليش كبير غير ربنا. دموعي غلبتني ونزلت من غير ما أحس. مصطفى اتقلق جداً واتحرك خطوة ناحيتي بس وقف في مكانه وقال
أنا أسف.. والله العظيم ما كنت أقصد أضايقك ولا أجدد عليكي أحزانك. أنا بس كنت عايز أدخل البيت من بابه.
مسحت دموعي بسرعة وقولتله بصوت مرعوب
أنا ماليش حد يا باشمهندس.. أنا كبيرة نفسي. لو عايز تقعد.. هتقعد معايا أنا.
بصلي بنظرة مليانة احترام وتقدير وقال
وده يشرفني.. وإنتِ ب ميت راجل يا نور. حدديلي ميعاد، وأنا هاجي أنا ووالدتي وأختي.
صراع الحقيقة والسر
روحت البيت يومها وأنا عقلي طار. الفرحة كانت سايعاني، بس الخوف كان بياكل في قلبي. الأسئلة القديمة رجعت تاني تصرخ في ودني هتقوليله الحقيقة؟ هتحكيله على إسلام؟ ولو حكيتي.. تفتكري هيوافق؟ مفيش راجل شرقي بيقبل بكده.. حتى لو مكنش ليكي ذنب.. حتى لو دكتور أحمد كتب التقرير!
حكايات_مني_السيد
قعدت أيام مش عارفة أنام. روحت لدكتور أحمد في عيادته واستشرته. أحمد بصلي وقال
يا نور.. مصطفى راجل محترم من كلامك عنه. بس النصيحة الطبية والإنسانية اللي هقولهالك الماضي بتاعك ده كان صفحة سودا واتقفلت، وإنتِ مغلطتيش الغلط اللي يخليكي تحسي بالذنب طول عمرك. إنتِ بنت بنوت قانوناً وطبياً وعقلاً. لو حكيتي.. إنتِ بتفتحي باب للشك ملوش لزمة، ومصطفى مش محتاج يعرف حاجة ملهاش أثر في الحاضر. ابدأي حياتك صفحة بيضا.
كلام الدكتور ريحني شوية، بس قلبي مكنش مطمن. أنا مبعرفش أداري، ومبحبش أعيش في كدبة.
وجيه يوم الزيارة. الباب خبط، وفتحت. دخلت والدة مصطفى، ست طيبة وبشوشة، وأخته الصغيره مريم. قعدنا، ومصطفى كان باصص للأرض باحترام. اتكلمنا في الأصول، والست والدته قالتلي
يا بنتي.. مصطفى حكالي عنك كتير، وعن أدبك وكفاحك. وإحنا مش جايين نناسب عيلة.. إحنا جايين نناسب بنت أصول، وإنتِ من النهارده بنتي.. والبيت بيتك.
الكلام دخل قلبي زي البلسم. تمت الخطوبة، ولبسنا الدبل. كانت الفرحة مش سايعاني، بس الغصة اللي جوه قلبي كانت لسه موجودة. كل ما مصطفى يمسك إيدي ويبصلي بحب، كنت بحس إني مخبية عنه حاجة كبيرة. كنت بقول لنفسي هو بيحب الصورة اللي شايفها.. لو عرف الحقيقة هيكرهني؟
المواجهة الكبرى
قبل الفرح بأسبوعين، كنا بننقي فرش الشقة. مصطفى كان كريم معايا جداً، ومكنش بيحسسني للحظة إني يتيمة أو ماليش ظهر، بالعكس.. كان بيشتريلي أحسن حاجة ويقول دي هتبقى مملكة نور.. لازم تكون أحسن حاجة في الدنيا.
وفي ليلة.. كنا قاعدين في عربيتة بعد ما خلصنا مشاوير الفرح. الجو كان هادي، وهو بصلي وقال
نور.. أنا بحس ساعات إنك سرحانة، وإن في جوه عيونك حزن مخبياه عني. لو في أي حاجة مضيقاكي.. أو أي حاجة خايفة منها، قوليلي. أنا مش بس جوزك المستقبلي.. أنا ظهرك وسندك وأخوكي وأبوكي.
الكلام ده كان القشة اللي قطمت ظهر البعير. مبقتش قادرة. حسيت إن الشرف والأمان مبيجوش بالسكوت، وإن لو مصطفى هيعيش معايا، لازم يعيش مع نور الحقيقية بكل وجعها وماضيها، ولو سابني.. يبقى على الأقل عشت صادقة مع نفسي.
حصري على صفحة روايات و اقتباسات…
أخدت نفس طويل، ودموعي بدأت تنزل. مصطفى اتخض وقال في إيه يا نور؟ خضيتيني!
قولتله بصوت بترعش وكل جسمي بينتفض
مصطفى.. أنا لازم أحكيلك حاجة. حاجة لو عرفتها ومبقتش عايزني.. أنا هعذرك ومش هلومك، وهقلع
الدبلة دي حالاً.
بصلي بتركيز وقلق، وسكت عشان يسمعني.
حكيتله كل حاجة. من أول يوم كنت فيه وحيدة ويتيمة وعندي عشرين سنة، لحد ما دخل إسلام حياتي، ولعبه على وتر الوحدة، واستغلاله المادي والمعنوي ليا، لحد الليلة اللي استسلمت فيها من خوفي إنه يسيبني، وحكيتله عن نذالته وهروبه، وعن الحادثة وموته، وعن دكتور أحمد والتقرير وكل حاجة.. محذفتش كلمة واحدة. كنت بتكلم وأنا مغمية عيني، مستنية اللحظة اللي هيفتح فيها باب العربية ويقولي انزلي.. إحنا منفعش لبعض.
لما خلصت كلام، ساد السكوت. سكوت قاتل. كنت سامعة صوت نفسي العالي، ومش قادرة أبص في وشه. مرت دقيقة.. اتنين.. تلاتة.. وكأنهم سنة.
وفجأة.. حسيت بإيده الداافية بتمسح دموعي بالراحة. فتحت عيني وبصيتله وأنا مرعوبة. ملقيتش في عينه غضب، ولا لقيت قرف.. لقيت نظرة حزن ووجع وكسرة.. بس الوجع
ده كان علشاني أنا.
مصطفى اتنهد تنهيدة طويلة وقال بصوت مليان رجولة وحنان
خلصتي يا نور؟
هزيت رأسي وأنا بترعش.
أخد إيدي والاتنين وضمهم لقلبه وقال
أنا زعلان.. زعلان أوي.. بس مش منك. زعلان إنك شيلتي الوجع ده كله لوحدك السنين دي كلها. زعلان إن الكلب ده مش عايش عشان أروح وأجيب حقك منه بإيدي وأخليه يدفع ثمن كل دمعة نزلتيها. يا نور.. إنتِ فاكراني إيه؟ أنا حبيت نور المكافحة، المحترمة، اللي صانت نفسها واشتغلت وربت نفسها في زمن يضيع فيه أي حد. اللي حصل معاكي ده كان ابتلاء.. كان استغلال لقلب بنت يتيمة مكنش ليها ظهر. إنتِ مغلطتيش.. إنتِ كنتِ ضحية لواحد ندل مبيسواش.
كمل وهو بيبتسم ويدوس على إيدي
والتقرير اللي مع دكتور أحمد ده.. أنا مش عايز أشوفه، ولا يلزمني. أنا شرفي هو إنتِ، وأماني هو وجودك معايا. الماضي ده ارميه في البحر يا نور. . ومن النهارده، أنا ظهرك وسندك، والل هيفكر بس يبص ليكي بنظرة مش عاجباكي.. هأكله بسناني.
حكايات_مني_السيد
ليلة العمر.. والنهاية السعيدة
في اللحظة دي.. حسيت إن روحي رجعتلي بجد. حسيت إن ربنا عوضني عن كل سنين الحرمان واليتم والوجع. رميت نفسي في حضنه وأنا بعيط وبقول الحمد لله.. الحمد لله يا رب.
وجيه يوم الفرح.
كنت واقفة قدام المراية بالفستان الأبيض. مكنتش مصدقة إن البنت اللي في المراية دي هي نفسها نور المكسورة بتاعة زمان. كنت منورة، وضحكتي راجعة تملى وشي. الباب اتفتح ودخل مصطفى بالبدلة السودا، أول ما شافني عينه دمعت من الفرحة. جه عليا وباس دماغي وقال بسم الله ما شاء الله.. أجمل عروسة شافتها عيني.
الفرح كان جميل، مكنش فيه ظيطة كتير، بس كان مليان حب وناس بجد بتحبنا. أصحابنا من الشاركة، ووالدة مصطفى وأخته اللي كانوا طايرين بيا. ولأول مرة من سنين.. محستش إني يتيمة. حسيت إن عندي عيلة.. عيلة بجد.
آخر الليل.. وصلنا الجديدة. مصطفى فتح الباب، ودخلت ووراه. قفل الباب وراه.. وبصيت حوليا. المكان كان هادي، بس المرة دي.. مكنش السكوت الموحش المرعب اللي كنت بهرب منه زمان. كان سكوت الأمان، سكوت البيوت اللي قايمة على المودة والرحمة.
مصطفى جه وقف ورايا، وحط إيده على كتفي وقال
مبروك يا نور عيني.. نورتي بيتك ومملكتك.
لفيت وبصيتله، وابتسمت من كل قلبي وقولتله
الله يبارك فيك يا سند العمر. أنا دلوقتي بس.. قدرت أقول إن حياتي بدأت بجد.
وعرفت ساعتها.. إن ربنا لما بيقفل باب، بيقفل عشان يحمينا، ولما بيأخر العوض، بيأخره عشان يدينا الأحسن والأجمل واللي يستاهل قلوبنا. أنا نور.. البنت اللي كانت يتيمة ووحيدة، والنهارده.. أنا أسعد وأقوى ست في الدنيا.
تمت بحمد الله
بقلم منى السيد




