حماتي

في نظره ونظرهم كلهم، أنا طلعت الست الغيورة المجنونة اللي جاية تخرب البيت.
بصيت عليهم.. واحد عامل نفسه عبيط، وواحدة بتعيط وتمثل، والتالت عامل نفسه مش هنا.. حسيت برعشة وساقعة تلج طلعت من صوابع رجلي لحد نفوخي فوق.
قلتله وأنا هادية هدوء يرعب
تمام.. أنا الست الوحشة، وأنا الغيورة والسبوبة.
ولفيت وشي لبسمة، وقبلت التحدي وقلت الكلمة بكلمتها
طب وبما إنك مظلومة، تقدري تيجي معايا حالاً على البنك؟
نسحب ال 50 ألف جنيه دول قدام الكل، وتثبتي ل جوزك وللناس إنك شريفة ونظيفة.
شهقات بسمة وعياطها وقفوا فجأة، وعينيها بدأت تروح وتيجي في الأوضة، ومبقتش قادرة تحط عينها في عيني.
كريم جوزي اتدخل بسرعة وعصيبته بانت

بنك إيه وزفت إيه اللي نروح فيه دلوقتي! يا لمياء إنتي مش هتهدي ولا ترتاحي إلا لما تخربي البيت ده وتهديه على دماغنا؟
بصيت لبسمة في عينها علطول وقلت
مش قادرة تيجي صح؟ اللي على رأسه بطحة بيحسس عليها . واللي جواه شيطان مش هيجرؤ يروح.
بسمة اتقفلت ومبقتش لاقية مفر، رفعت راسها وزعقت بغل
وأنا إيه اللي هيخوفني؟ مش هخاف وهروح معاكي!
وقلتلها طب يلا بينا.

أخدت الدفتر ولفيت ضهري ومشيت. كريم حاول يمسك إيدي ويوقفني، بس نفضت إيدي منه بقوة.
بسمة ملقتش مفر غير إنها تجز على سنانها وتمشي ورايا وهي بتجر رجلها بالعافية، وكريم وأحمد مشيوا ورانا وهم على آخرهم من القلق.
طول الطريق، الجو كان مشحون ومشدود زي وتر الكمانجة.
أول ما وصلنا البنك، كانت هي نفس الموظفة بتاعة امبارح قاعدة على الشباك. لما شافت الحزب الحاكم جاي مكون من أربعة، عينيها لمعت بفضول ملوش آخر، وعرفت إن فيه حكاية كبيرة هتحصل.
قدمت لها الدفتر وبطاقتي تاني
مساء الخير يا فندم، مدام بسمة وصلت بنفسها أهي، وجاهزين نسحب الفلوس.
الموظفة أخدت الورق، وشافت بطاقة بسمة، وقالت بالخطوات الروتينية
مدام بسمة، اتفضلي امضي هنا بالإستلام.
إيد بسمة كانت بترتعش زي ورقة شجر في عز الخريف. مسكت القلم وفضلت واقفة مش قادرة تنزل بيه على الورقة.
كريم كان واقف وراها، وشه قالب أسود وعينيه بتبعث رسايل تهديد وتحذير لبسمة عشان متغلطش.
قلت لها ببرود قاسي امضي خلصينا.

أخدت نفس عميق كأنها بتموت، واستجمعت شجاعتها كلها ومضت بسرعة على الإيصال.
الموظفة أخدت الورق وبدأت تعد.. 50 ألف جنيه كاش، اترصوا رزمة فوق المكتب.
كريم تنهد براحة وأخد نفسه، وبصلي بنظرة شماتة واستهزاء كأنه بيقولي شفتي بقى إنك موهومة وعقلك طاير؟
بسمة هي كمان فردت ضهرها ورفعت راسها لفوق كأنها كسبت معركة، وبصتلي بكل ثقة وتحدي
يا مدام لمياء، ارتحتي كده؟ الفلوس اتسحبت أهي، وده أكبر دليل إننا مفيش بيننا حاجة وإنك كنتِ بتتبلي علينا بالباطل، صح ولا لأ؟

مكلفتش نفسي حتى إني أرد عليها.
لفيت وشي للموظفة وقلت لها بكل برود وهدوء
لو سمحتي يا فندم، أنا عايزة كشف حساب تفصيلي للحساب المشترك ده، من أول يوم اتفتح فيه لحد اللحظة دي.
الموظفة اتفاجأت وقالت

يا فندم، عشان نطلع كشف حساب مشترك، لازم موافقة الطرفين أصحاب الحساب.
قلت لها بثقة وأنا الطرف التاني، وبقولك اطبعيه.
كريم حاول يتدخل ويقاطع عشان يوقفها، بس كان خلاص القطر فاته.
بصيت له وضحكت ضحكة باردة ومستهزئة
إيه؟ خايف نكشف المستور ولا إيه؟
وش بسمة اتقلب أصفر ورجع اتخطف تالي. الموظفة بصت لنا وإحنا واقفين، وهزت راسها وقالت
تمام يا فندم، ثواني ويكون جاهز.
صوت المكنة بدأ يشتغل زززز.. زززز ويطبع.
ورقة.. ورا ورقة.. ورا ورقة…

لحد ما طلع في إيدها حزمة ورق A4 محترمة وتخينة.
أخدت كشف الحساب وبدأت أقرا من أول سطر فوق.
الحساب ده مفتوح من تلات سنين فاتوا!
الجزء الثالث الصدمة الكبرى
المبلغ
اللي بدأ بيه الحساب كان 20 ألف جنيه، ومتحولين مباشرة من الحساب الشخصي ل كريم جوزي!
ومن يومها، كريم كان بيبعت كل شهر بانتظام مبلغ 5 آلاف جنيه على الحساب ده.
أما المصاريف واللي اتصرف من الحساب.. فكانت تشيب وتشهد على ليفل العز اللي كانوا عايشين فيه
محل مجوهرات فلان 188000 جنيه.
محل براندات وشنط عالمية 96000 جنيه.
معرض سيارات فلان مقدم عربية 300000 جنيه.
التواريخ كلها كانت ماشية بالملي مع الأيام اللي كانت بسمة بتظهر فيها بغوايش ودهب جديد، أو شنطة ماركة، أو حتى العربية الزيرو اللي جابتها مؤخراً!
دا كله في الوقت اللي أحمد ، مرتبه كله على بعضه مبيكملش 8 آلاف جنيه في الشهر!
كنت بقلب الورق، وكل صفحة بتقلب معاها دمي وبتزود الساقعة في جثتي.
كريم وبسمة كانوا واقفين، ووشهم بيجيب ألوان ومبقاش فيهم نقطة دم واحدة.