
هنا أنا مسكت تليفون منة القديم اللي كشف حسابه لسه مفتوح في إيدي، ورفعته في وش طارق بالظبط لحد ما الشاشة المكسورة بقت عند عينيه، وقولتله بغل
جيب واحد وأصول؟! طب بص في الشاشة دي كويس واقرأ الأرقام دي! تلات سنين كاملة، منة محولة لحسابك الشخصي مبلع يوازي 580 ألف جنيه! مرتبها ومكافآتها وشقاها كله كان بينزل في حسابك تاني يوم ما يقبضوه! ده اللي بتسميه جيب واحد؟!
وتابعت وأنا بضغط على كل كلمة
في قسيمة الطلاق اللي مضيتها عليها الصبح، مكتوب إنها متنازلة عن كل حقوقها الشرعية والمالية وفلوس تجديد الشقة.. طب فين نصيبها من الفلوس اللي حولتهالك دي كلها؟ وفين الشقة الجديدة اللي خلتها تدفع قرشها وقسطها الأخير قبل الطلاق بيوم واحد، ورحت
كتبتها باسمك لوحدك ؟!
بمجرد ما قولت الكلمات دي، الحارة كلها اتقلبت، والجيران بدأوا يصرخوا ويتكلموا على طارق وأمه، وبقت الفضيحة اللي كانوا عايزين يعملوها لينا.. هي الفضيحة اللي وقعت فوق دماغهم!
بص طارق على شاشة التليفون، وشه جاب ألوان؛ من أزرق لأبيض، لما شاف أرقام التحويلات واضحة وضوح الشمس ومافيهاش مجال للإنكار.
الجيران اللي واقفين يتفرجوا بدأوا يتهامسوا ويوشوشوا بعض
يا خبر أبيض! دي كانت بتحول له آلاف الجنيهات كل شهر، يعني كانت بتسلم مرطبها أول بأول!
وبعد كل ده يقولوا إنها واكلة شاربة عندهم وعايشة عالة! وكمان جايين يطمعوا في دفتر التوفير؟ والله ناس ما بتختشيش!
لما أم طارق لقت ابنها اتلجم ومش عارف ينطق، راحت متنططة في مكانها وبدأت تصرخ بصوتها اللعلع عشان تداري على الحقيقة وتوشوش على الكلام
انتي هتتبلي علينا وتغيري الكلام ولا إيه يا ست انتي؟! جرى إيه يا ختي، وإذا كانت بتحول فلوس، إيه الجريمة في كده؟ ما الفلوس دي كانت بتتصرف على اللقمة اللي بتاكلها والبيت اللي قعدت فيه تلات سنين! هو نور البيت والمية والأكل والشرب ببلاش؟ ابني شقيان وتعبان وصارف دم قلبه على البيت ده، ومساهمتها دي كانت واجب عليها!
واجب عليها؟!
ضحكت ضحكة كلها سخرية وبرود، وقربت منها خطوة ورفعت التليفون في وشها بالظبط
فتحي عينيكي دول وبصي كويس! تلات سنين، يعني قريب من 600 ألف جنيه! منة مهندسة ومرتبها محترم، وكانت بتحول لابنك كل شهر مبالغ تعدي ال 15 وال 20 ألف جنيه، حتى مكافأة السنوية وال بونص مكنتش بتشيل منه مليم لنفسها! ست عايشة بالهدوم المقطعة دي، ولابسة جزمة دايبة، قوليلي بقا صرفت إيه من فلوسها في بيتكم يا أم طارق؟!
لفيت وشي فجأة لطارق، وبصيت له بنظرة حادة زي الموس
انت مش لسه قايل إن الفلوس دي كانت بتتشال في حتة واحدة عشان انتوا بيت واحد؟ طب فين الحساب المشترك ده؟ فين دفتر التوفير اللي شلتوا فيه التحويشة؟ وليه في قسيمة الطلاق والورق، أختي ومتنازلة عن كل حقوقها وفلوس تجديد الشقة؟ وإلا هو انت اللي سرقت الفلوس دي وهرّبتها لحسابك، وضغطت عليها وهددتها عشان تمضي على ورق التنازل ده وتخلص من جحيمكم؟!
منة كانت واقفة ورايا، كتافها عمالة تترعش من كتر العياط والخوف. ودموعها اللي طول السنين اللي فاتت انفجرت فجأة، وصرخت بصوت مخنوق ومكسور
حرام عليك يا طارق! انت إيه يا أخي، مفيش في قلبك رحمة ولا دين؟ كنت بتقولي بجمع الفلوس دي عشان نشتري شقة أكبر نعيش فيها، وتقولي أمي هتشيل الفلوس عشان لما نخلف! وأنا زي الهبلة صدقتك، مكنتش بشتري طقم جديد ألبسه، ولما كنت بتتعب وأسخن مكنتش بروح لدكتور وبشرب مية وأنام عشان مأصرفش قرش! وفي الآخر تروح تشتري الشقة الجديدة وتكتبها باسمك لوحدك،؟!
أول ما الكلام ده طلع من بوق منة، الحارة كلها اتقلبت والجيران بدأوا يصرخوا ويتكلموا. أمي سمعت الكلام ده وجالها صدمة، والمعلقة اللي كانت في إيدها نسيت تشيلها من الأرض وبقت تبص لمنة ولأهل طارق، والغل والنار بدأوا يطلعوا من عينيها.
انتي هتتبلي عليا يا منة ولا إيه؟! إحنا اتطلقنا عشان مش متفاهمين وخلاص! ودفتر التوفير ال 500 ألف جنيه ده، ده كان جهازك ودخل بيتي، وطالما كنا متجوزين يبقى ليا نصيبه فيه بالشرع والعرف!
05
نصيب في عينك يا راجل يا ناقص!
مقدرتش أتحكم في نفسي، ورفعت إيدي وبكل عزمتي نزلت بقلم رن على وش طارق . صوت القلم طاخ رن في المنور كله والجيران سمعوه.
انتي بتمدي إيدك على ابني ؟! أم طارق كانت رايحة شعري، بس أمي الله يديها الصحة جرت من جوة الشقة وشايلة في إيدها ووقفت في وشها زي الأسد تدافع عني وعن منة، وزعقت فيها
وريني كده يا نادية هتمشي خطوة واحدة إزاي! بنتي راحت بيتك عشان تتصان، مش عشان تبقا جارية وتيجوا ! ضحكتوا عليها وخلتوها تحول شقاها، وطلعتوها من بيتها من غير مليم، ودلوقتي جايين تتبجحوا وتطلبوا دفتر التوفير اللي أختها الكبيرة شقيت وتغربت عشان تعملهالها؟ والله العظيم لو ما غرتوا من وشي دلوقتي حالا لأطلب ليكم النجدة
طارق حط إيده على وشه اللي احمر من القلم، وهو حاسس بالخزي والعار والذل وسط الجيران اللي بيبصوا له بقرف، وبدأ يخاف ويتراجع.
أنا أخدت نفسي وهديت، ورفعت دفتر التوفير في الهوا، وقولت بصوت عالي سمّع الحارة كلها
اسمع يا طارق انت وأمك كويس عشان تفهموا القانون. . الدفتر ده باسمي أنا، منة أختها الكبيرة! من تلات سنين اديته لأختي أمان ليها، وعمري ما نقلت ملكيته ليها ولا كتبته باسمها. يعني بالقانون والشرع، دي فلوسي أنا الشخصية،
ماليهاش أي علاقة بجواز ولا طلاق ولا قايمة! لو عايزين تروحوا تشتكوا في المحاكم، روحوا، ورونا هتعملوا إيه!
طلعت بسرعة ورقة الحسابات والتحويلات اللي طبعتها من التليفون، وقولتله
أما بقى ال 580 ألف جنيه اللي انت لفتهم ولطشتهم منها، وال 40 ألف جنيه بتوع قسط الشقة اللي خلتها تحولهم قبل الطلاق بيوم واحد تحت بند النصب والتدليس وباسم مشاركة في شقة، فإحنا هنرفع بيهم قضية تبديد أموال واستيلاء بالنصب في فترة الجواز. وقسيمة الطلاق والتنازل اللي انت مضيتها عليها دي، المحكمة هتبطلها بالثلاثة لما نثبت إنها تمت تحت التهديد والإكراه والغش!
أول ما جيت سيرة المحاكم وقضايا النصب والاستيلاء، طارق ركبه خبطت في بعضها ووشه بقى زي الأموات. الراجل شغال موظف في الحكومة، ولو ديل بتاعه اتمسّك في قضية والنصب زي دي، هيرفدوه ومستقبله هيضيع في ثانية.
بسرعة شد إيد أمه وقالها برعب
أمي.. خلاص يلا بينا.. نمشي من هنا!
أم طارق رغم جبروتها، لما شافت الورق والتحويلات وجديتي في الكلام، خافت ورجليها شالتها. بدأت تبرطم وتدعي بكلام مش مفهوم، وخدت ابنها وجريوا على السلم ، والجيران وراهم بيضحكوا .
الناس مشيت والباب اتقفل.
أمي جريت على منة وأخدتها في حضنها وبقت تبكي بحرقة
سامحيني يا بنتي.. سامحيني يا قلب أمك.. مكنتش أعرف إنك شايلة الجبل ده كله على كتافك ومتبهدلة كده تلات سنين.. أنا كنت عمية ومش شايفاكي!
قربت منهم، ومسكت إيد منة اللي كانت بتترعش، وحطيت دفتر التوفير ال 500 ألف جنيه في إيدها وقولتلها
أنا قولتلك يوم فرحك إن ده سندك وأمانك. ودلوقتي انتي رجعتي بيتك الكبيرة، ومحدش في الدنيا يقدر أو ييجي عليكي تاني. الفلوس دي، والفلوس اللي هنطلعها من عين الواد ده، هتبدأي بيها حياتك من جديد وتعملي اللي انتي عايزاه.
منة ضمت الدفتر لصدرها جامد، وهزت رأسها وهي بتعيط من الفرحة والراحة. تلات سنين كابوس راحوا لحالهم، بس على الأقل لما فاقت، لقت وراها ضهر وعيلة وأخت كبيرة تشيل عنها حمول الدنيا كلها.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




