
خمس سنين.. خمس سنين عدوا علينا زي الجمر اللي بياكل في صدورنا. حياتنا اتبهدلت، ولادي كبروا قبل أوانهم، والبيت اللي كان دايماً عمران بضحكتها بقى زي القبر الصامت. كنا بنصحى وننام على أمل تليفون أو خبر، وحالتنا الماديه والنفسية بقت في الحضيض من كتر الدوران والمصاريف على الشركات والناس اللي كانت بتستغل وجعنا وتقولنا شفناها هنا ولا هنا.. لحد ما جه اليوم ده.
كنت واقف في المطبخ بحضر الفطار أنا وبنتي الكبيرة، وولادي الاتنين الصبيان بيرتبوا الأوض وبيمسحوا الصالة زي ما اتعودنا نقسم الشغل بيننا عشان نعيش. وفجأة.. الباب خبط.
قلعت مريلة المطبخ وأنا بمسح إيدي، ورايح أفتح وأنا متوقع تماماً إنه “عم محمد” بتاع اللبن اللي بيجي في نفس الميعاد كل يوم. فتحت الباب.. والزمن وقف بيا.
إيمان!
واقفة قدامي.. ملامحها متغيرة، وشها دبلان، بس هي إيمان. واقفه وشايلة على إيدها طفل صغير، عنده حوالي سنة ونص، عيونه واسعة وبيبص حواليه باستغراب.
أنا اتجمدت مكاني.. لساني عجز عن النطق، ضربات قلبي كانت سريعة لدرجة كنت حاسس إنها هتطلع من صدري. مبقتش عارف أصرخ، أعيط، ولا آخدها في حضني. الفرحة والذهول شلوني تماماً.
على صوت سكوتي، بنتي الكبيرة جرت من المطبخ تشوف في إيه.. أول ما شافتها، صرخت بلهفة وفرحة هزت البيت كله: “ماما!! ماما حمد الله على السلامة! كنتي فين يا أمي؟!”
البنت كانت هترمي نفسها في حضنها، بس عينها نزلت على الطفل اللي إيمان شايلاه.. خطوتها وقفت، ملامح الفرحة اتحولت لذهول مريب، وقالت بصوت بيترعش: “.. ومين.. ومين ده اللي معاكي يا ماما؟”
إيمان بصت لنا ببرود غريب، وعلى وشها ابتسامة باهتة متقاطعة مع نظرة الشك القديمة اللي كنا بنشوفها في عيونها.. وقالت بكل هدوء وبساطة دمرت قلبي:
”كنت عند عيلتي اللي بجد.. الناس اللي بيحبوني وبيخافوا عليا ومش عايزين يموتوني.. وده ابني الصغير.. محمود.”
الكلمة نزلت عليا زي الصاعقة.. حسيت الأرض بتلف بيا، ورجلي مش شيلاني، كنت هقع من طولي لولا إن ابني سندني من ضهري وهو بيبكي ومش فاهم حاجة.
إيمان رجعت.. بس الرجوع ده مكنش نهاية العذاب، ده كان بداية المأساة الحقيقية اللي محدش في الدنيا يستحملها
دخلتها الشقة خطوة خطوة وكأنها غريبة عن البيت، أو كأننا إحنا اللي ضيوف عندها. عيون ولادي كانت مبرقة، والدموع مغرقة وشوشهم، ما بين فرحة رجوع أمهم بعد خمس سنين عذاب، وما بين الصدمة والخوف من الطفل اللي شايلاه وبتقول عليه ابنها!
قعدت على الكنبة ببرود غريب، وضمت الطفل لصدها بقوة، والولد كان هادي جداً، عينيه واسعة وبيمص في صباعه ويبص لحيطان الشقة باستغراب. بنتي الكبيرة قربت منها بهدوء وهي بتترعش، وحاولت تلمس كتفها وقالت بصوت مخنوق: “يا أمي.. وحشتينا أوي، كنتي فين؟ والبيبي ده ابن مين؟”
إيمان زقت إيد بنتها بقسوة ونظرة الشك القديمة رجعت تلمع في عينيها وقالت بصوت حاد: “ابعدي عني! قولتلك ده ابني.. محمود ابني حبيبي اللي ربنا عوضني بيه عنكم.. إنتوا كنتوا عاوزين تموتوني، لكن هو اللي بيحبني وبيحميني.. متقربوش منه ولا مني!”
أنا كنت واقف مكاني مشلول، الكلمات طارت من دماغي. إيمان اللي كانت بتخاف على ولادها من الهوا الطاير، جاية دلوقتي بتنكرهم وبتنسب لنفسها طفل غريب مش عارفين جه منين! مسكت نفسي بالعافية وقربت خطوة، وقولتلها بنبرة هادية خالص عشان متتشنجش: “يا إيمان يا حبيبتي، حمد الله على سلامتك الأول.. البيت نور بيكي وبولادك اللي كبروا وبقوا رجالة وآنسة قد الدنيا.. مفيش حد هنا عاوز يؤذيكي، إحنا بنحبك.. طب فهميني بس، إزاي محمود ابنك؟ وإنتي غايبة عننا من خمس سنين؟”
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




