الولادة.. اليوم اللي اتقلبت فيه حياتنا .
خرجت من العمليات، لقيت الوجوه متبدلة. الدكتور دخل علينا وعلامات الأسف على وشه، وقالنا بصوت مخنوق: “ربنا يصبركم.. الولد اتولد ضعيف جداً ومات بعد ساعات في الحضانة.. البنت صحتها كويسة وزي الفل، أصل الغذاء كله أخدته أخته وهي في بطن أمها وهو نزل ضعيف.”
انا فضلت اعيض على ابني قلبي اتكسر عليه مات من غير ما اشوفه حتى
بس جوزي كان في عالم تاني الغضب في قلبه اكبر من الحزن بص لبنتي اللي لسه حتة لحمة حمرا في اللفة على إنها “مجرمة”! كأنها هي اللي أخوها بإيديها! رفض يشيلها، رفض يبص في وشها، وحتى اسماها مختارهوش ومكنش طايق يسمعه. كان بيقولي بقلب حجر: “مش عايزها.. دي هيه السبب.. عِزوتي بسببها مات الولد اللي كان املنا الوحيد.”
أنا كنت باخد بنتي في حضني وأبكي بدل الدموع دم. ذنبها إيه طفلة ملهاش حول ولا قوة؟
سميتها “أمل”.. كان عندي أمل إن الاسم ده يديني قوة أعيش في الجحيم اللي بقيت فيه، وأمل إن قلب أبواها يحن في يوم من الأيام.
ومرت السنين.. وأمل كبرت وبقت عندها 13 سنة. 13 سنة والبنت بتكبر قدام عينيا وهي شايفة الجفا والكسرة. كانت بتشوف كل العيال في المحيط بتاعنا مع أبهاتهم، بيلعبوا معاهم، بيشيلوهم، وهي عمرها ما حست إن ليها أب. أبواها عايش معاها في نفس البيت بس كأنه غريب، لا بيكلمها ولا بيطبطب عليها، ولا عمره نطق اسمها. كانت لما تعدي من جنبه يلف وشه الناحية التانية. البنت كبرت هادية، ساكتة، دايماً سرحانة، بس كان في عينيها نظرة حزن تقطع القلب.
وفي يوم.. اليوم اللي عمري ما هنساه .
كنت بحضر الغدا، وقولت أدخل أوضتها أناديها عشان تاكل. فتحت الباب براحة وصوت رجلي مكنش باين.. وبصيت.. واتصدمت صدمة عمري!
جسمي كله اتنفض، وحسيت إن ركبي مش شايلاني. الدم اتجمد في عروقي من اللي شفت بنتي بتعمله! لثواني مكنتش قادرة أستوعب، هل ده حقيقة ولا أنا اتجننت؟
جريت بسرعة الصاروخ، مكنتش شايفة قدامي من كتر الذهول والخوف والرجفة اللي هزت كياني. دخلت الصالة وجوزي كان قاعد بيشرب شاي، مسكته من إيده بكل قوتي وكنت بشده ورايا وأنا بتنفض وبترعش كأني شوفت ميت قايم من تربته.
جوزي استغرب من منظري وزعق: “في إيه يا ولية؟ جرا ل عقلك إيه؟” مكنتش قادرة أنطق، لساني كان مربوط.. شديته لحد باب الأوضة، ورفعت إيدي وأنا بصوب صباعي ناحية البنت، وإيدي بتترعش زي ورقة شجر في مهب الريح.
جوزي بص مكان ما شاورت واتجمد في مكانه كأنه اتحول لتمثال من تلج. عينيه وسعت على أخرها وعرف وقتها ليه ربنا اختار البنت دي تعيش !!!!!…..
جوزي وقف متنح، أنفاسه حامية وصوت ضربات قلبه كنت سامعاها من كتر الصمت اللي حل في الأوضة. البنت، أمل، اللي كان مفكرها “قاتلة أخوها” واللي قاطعها ١٣ سنة، كانت قاعدة على الأرض في ركن الأوضة، وحواليها ورق كتير جداً، خرائط، ورسومات هندسية معقدة، وكتب قديمة بلغات غريبة، وجنبها “تابلت” قديم كانت مستلفاه من بنت عمها عشان تذاكر عليه.
لكن الصدمة مكنتش في الورق، الصدمة كانت في اللي بتعمله! أمل كانت ماسكة حتة حديدة مصدية، وفي إيدها التانية جهاز صغير متوصل بأسلاك غريبة مجمعاها من لعب أطفال قديمة وخردة من البيت، وكانت بتركب قطع دقيقة جداً مع بعض بحرفية ومرونة متطلعش من إيد دكتور جراح! والأغرب من ده كله، إنها كانت بتكلم نفسها بلغة إنجليزية فصحى وبطلاقة رهيبة، وبتكتب معادلات رياضية وفيزيائية معقدة جداً على الحيطة بتباشير، معادلات دكاترة الجامعة ميعرفوش يفكوا رموزها!
بس مش ده أبوها.. اللي جمده إنه لمح على شاشة التابلت تصميم كامل لـ “ماكينة ري حديثة” كانت بتشتغل بالطاقة الشمسية وبتوفر نص المياه، والتصميم ده كان عليه اسم “مشرع تطوير أراضي الصعيد” باسم شركة هندسية كبرى كان جوزي نفسه مقدم فيها على شغل عشان يورد لهم مستلزمات ورفضوه وقالوا له التصاميم اللي معاك قديمة ومبتنفعش! البنت كانت بتعدل على التصميم ده وبتصلح العيوب اللي فيه وهي عندها ١٣ سنة!
جوزي رجع خطوتين لورا، وشه جاب مية لون، وبلع ريقه بصعوبة وقال بصوت مرعوب وواطي: “ده.. ده إيه ده؟ البنت دي ملبوسة؟ دي جنية؟”
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
