وأنا لأول مرة مكنتش خايفة من رد فعل حد.
قلت بهدوء
آه يا ماما، عاملاها عشان طول السنين اللي فاتت كنت بحس إن اللي بعمله واجب، لكن لما الموضوع بقى نصيب زي ما حضرتك قولتي، يبقى لازم كل واحد يعرف نصيبه.
أخت أحمد ضحكت ضحكة صغيرة وقالت
يعني إنتِ هتحاسبينا على كام طبق أكل؟
بصيتلها وقلت
مش على الأكل بس.
وسحبت ورقة تانية.
على الوقت، والمجهود، والمصاريف وعلى إني كنت بجهز عزومة كاملة وأنا عندي بيتي وولادي.
ملامحها اتغيرت.
حماتي قالت
إنتِ مكبرة الموضوع أوي يا ندى.
رديت
أنا اللي كنت بصغره يا ماما كل جمعة كنت أقول معلش، دي أمه دي أخته دي عيلته. بس محدش كان بيقول إن أنا كمان ليا بيت وعيلة.
سكت المكان.
أحمد قرب من الورقة وبص فيها.
كان واضح إنه لأول مرة شايف الرقم كامل قدامه.
قال بصوت هادي
ندى إنتِ كنتِ بتدفعي كل ده من غير ما تقوليلي؟
قلت
كنت بقولك.
بصيتله.
بس كل مرة كنت بتقولي متحسبيهاش.
نزل عينه في الأرض.
حماتي حاولت تغير الكلام
يا أحمد، مراتك بقت بتحسب على أمك؟
قبل ما يرد، رن جرس الباب.
كلنا بصينا ناحية الباب.
كان أخو أحمد الكبير.
دخل وهو بيقول
هو في إيه؟ أنا سمعت صوت عالي من تحت.
حماتي بسرعة قالت
ولا حاجة يا ابني، ندى عاملة مشكلة عشان أكل الجمعة.
لكن أخو أحمد بص للورقة في إيد أحمد وقال
إيه دي؟
سكت أحمد لحظة.
وبعدين قال
حساب الأربع سنين اللي فاتوا.
أخوه أخذ الورقة وبدأ يقرأ.
كل ما ينزل سطر، ملامحه تتغير.
لحد ما رفع عينه وقال
هو إحنا كنا بنعمل كده فعلًا؟
حماتي اتضايقت
يعني إيه بنعمل كده؟ هي مرات أخوك وكانت بتعمل أكل.
رد أخوه
كانت بتعمل لبيتها مش لعيلة كاملة كل أسبوع.
الكلمة نزلت على حماتي تقيلة.
لأن لأول مرة حد من أولادها قالها حاجة هي مش عايزة تسمعها.
لكن المفاجأة كانت لما أحمد فتح درج في الصالة وطلع كيس صغير.
بصلي وقال
ندى هو ده اللي كنتِ مخبياه؟
استغربت.
إيه ده؟
فتح الكيس.
كان فيه إيصالات شراء قديمة.
قال
لقيتهم وأنا بدور على حاجة من فترة إنتِ كنتِ محتفظة بكل حاجة؟
هزيت راسي.
كنت بحاول أثبت لنفسي إني مش بتوهم.
قعد أحمد على الكنبة وهو ساكت.
وبعدين قال جملة خلت حماتي تتوتر
ماما لازم نتكلم في حاجة تانية.
حماتي بصتله
حاجة إيه؟
بص لأخته.
حاجة تخص كل مرة كنتوا بتطلبوا فيها من ندى حاجة وكأنها أمر واقع.
وفجأة أخت أحمد اتوترت وقالت
يعني إيه؟
أحمد رد
يعني من النهارده مفيش حاجة من غير اتفاق.
لكن قبل ما يكمل، موبايل أخت أحمد رن.
بصت للشاشة واتغير لون وشها.
قالت
أنا لازم أمشي.
لكن وهي بتقوم، وقع من شنطتها ظرف صغير على الأرض.
أحمد انحنى عشان يرفعه
ولما فتحه بالصدفة، لقى حاجة خلت الكل يسكت.
لأن الظرف كان فيه ورقة مكتوب فيها
جدول جمعات الشهر الجاي مين هيجيب الأكل ومين هيجيب الحلويات.
والاسم الموجود جنب كل جمعة كان اسم واحد بس
ندى مسك أحمد الورقة بإيده، وفضل يبص فيها ثواني طويلة.
رفع عينه ناحية أخته وقال
إيه ده يا سارة؟
اتلخبطت.
دي دي حاجة قديمة.
قلب أحمد الورقة.
قديمة؟ دي مكتوب عليها مواعيد الجمعة الجاية كلها!
سكتت.
حماتي حاولت تاخد الورقة من إيده
يا أحمد متكبرش الموضوع، دي كانت هزار بينا.
ضحكت بسخرية وقلت
هزار؟ يعني إنكم ترتبوا مين هييجي ياكل عندي وأنا آخر واحدة أعرف يبقى هزار؟
سارة قالت بعصبية
إنتِ ليه واخدة كل حاجة على نفسك؟ إحنا كنا متعودين إنك بتحبي تعملي الأكل.
بصيتلها وقلت
أنا كنت بحب أعمله لما يكون من اختياري.
وقفت لحظة، وبعدين كملت
لكن لما يبقى متوقع مني، ويبقى زعلكم جاهز لو رفضت، ده مش حب ده ضغط.
أحمد كان ساكت، بس ملامحه كانت مختلفة.
مش زي كل مرة.
المرة دي كان بيسمع.
حماتي قربت منه وقالت
يا ابني، يعني عشان شوية أكل هتخلي مراتك تزعلنا؟
أحمد رد بهدوء
لا يا ماما بس عشان شوية أكل ما نخليش مراتي تزعل.
الجملة وقعت عليهم زي الصدمة.
لأول مرة أحمد حط حد واضح.
سارة أخذت شنطتها وقالت
واضح إن وجودنا بقى تقيل عليكم.
رد أحمد
وجودكم عمره ما كان تقيل لكن إن حد يتحمل كل حاجة لوحده هو اللي كان تقيل.
خرجوا.
وأنا قفلت الباب ووقفت في مكاني.
لكن اللي حسيت بيه كان حاجة تانية.
راحة.
كأن حمل كان فوق كتافي ونزل أخيرًا.
بالليل، أحمد قعد جنبي وقال
ندى أنا عايز أعتذرلك.
بصيتله.
على إيه؟
قال
إني كنت شايف الموضوع بسيط ومخدتش بالي إنك كنت بتتعبي.
سكت شوية وبعدين قال
بس في حاجة أنا مش فاهمها.
إيه؟
إنتِ ليه استحملتي أربع سنين؟
السؤال .
لأني أنا نفسي كنت بسأله لنفسي.
قلت
عشان كنت فاكرة إن الزوجة الشاطرة هي اللي تستحمل وإن لو قلت لأ أبقى وحشة.
مسك إيدي وقال
لا يا ندى الزوجة الشاطرة مش اللي الناس ترتاح على حسابها.
ابتسمت لأول مرة من فترة.
لكن اللي مكنتش أعرفه
إن الموضوع ما انتهيش.
لأن يوم الجمعة اللي بعده حصل شيء محدش كان متوقعه.
الساعة 11 بالظبط
الموبايل رن.
بصيت للشاشة.
حماتي.
بصيت لأحمد.
قال
ردي.
فتحت الخط.
ألو يا ماما.
جالي صوتها هادي بشكل غريب
ندى أنا عايزة أطلب منك طلب.
استغربت.
لأنها أول مرة من سنين تقول أطلب مش اعملي.
قلت
اتفضلي.
سكتت شوية.
وبعدين قالت
ممكن تيجي عندي النهارده؟
بصيت لأحمد.
قلت
فيه حاجة حصلت؟
ردت بصوت مكسور
آه حصل.
وسكتت لحظة.
أنا اكتشفت إن فيه حاجة مخبيها عنكم من زمان وحان الوقت تعرفوها.
اتجمدت مكاني.
لأن نبرة صوتها مكنتش نبرة واحدة زعلانة.
كانت نبرة حد خايف من حاجة هتظهر.
قلت
حاجة إيه يا ماما؟
قالت
تعالي بس وهتعرفي ليه كنت متمسكة إن كل جمعة تيجي عندي.
وقبل ما تقفل، سمعت صوت ورق بيتقلب جنبها
وبعدين قالت جملة خلتني أبص لأحمد بصدمة
بس أوعديني يا ندى لما تعرفي الحقيقة، متكرهيش أحمد سكتُّ وأنا ماسكة الموبايل.
الجملة الأخيرة فضلت ترن في ودني
لما تعرفي الحقيقة، متكرهيش أحمد.
قفلت المكالمة وبصيتله.
كان واقف مكاني، ووشه اتغير.
قلت
أحمد إنت تعرف هي تقصد إيه؟
هز راسه بسرعة.
لا. والله ما أعرف.
لكن طريقته خلتني أحس إن فيه حاجة ناقصة.
سألته
عمرك حسيت إن مامتك كانت بتعمل كده لسبب تاني غير الأكل؟
سكت.
ودي كانت أول مرة أشوفه مش لاقي رد.
قال
في حاجة حصلت من زمان بس مكنتش فاكر إنها مرتبطة بالموضوع ده.
قلبي دق أسرع.
حاجة إيه؟
تنهد وقعد.
قبل جوازنا بشهور ماما كانت بتمر بظروف صعبة. كان عليها ديون ومشاكل، وأنا كنت بحاول أساعدها.
استغربت.
بس إيه علاقة ده بالجمعات؟
بص للأرض وقال
مش عارف عشان كده لازم نروح.
بعد ساعة كنا واقفين قدام بيت حماتي.
دخلنا لقيناها قاعدة في الصالة.
لكن الغريب إنها مكنتش عاملة نفسها القوية المعتادة.
كانت ماسكة ظرف قديم.
أول ما شافتني قالت
اقعدي يا ندى.
قعدنا.
بصت لأحمد وقالت
أنا غلطت في حقك وفي حق مراتك.
أحمد اتفاجئ.
ماما
رفعت إيدها تسكته.
لا، اسمعني.
فتحت الظرف وطلعت أوراق.
حطتها قدامنا.
من أربع سنين قبل جوازكم بأيام، كان فيه كبيرة.
بصيت لأحمد.
كملت
أنا كنت خايفة أقولك.
سألها
خايفة من إيه؟
قالت بصوت منخفض
خايفة تعرف إن البيت كان ممكن يضيع مننا.
اتصدمت.
يعني إيه؟
قالت
كان فيه قرض قديم على البيت ولو اتأخرنا في السداد كنا .
أحمد مسك الورق.
وإنتِ عملتي إيه؟
نزلت عينيها.
لما ندى دخلت حياتكم شوفت فيها بنت جدعة وبتحب تساعد. في الأول لما كانت تعمل الأكل وتيجي، كنت بفرح.
سكتت.
وبعدين اتعودت.
الكلمة الأخيرة خرجت منها بصعوبة.
اتعودت إنها تشيل عني حاجات كتير.
بصيتلها.
لأول مرة حسيت إنها مش بتدافع عن نفسها.
كانت بتعترف.
قالت
بس الحقيقة اللي مقلتلكوش عليها إن الفلوس اللي كانت بتوفرها من مصاريف الجمعات ساعدتني فترة أسدد جزء من اللي عليا.
أحمد قام واقف.
يعني كنتِ بتخليها تصرف عشان تسددي ديونك؟
هزت راسها ودموعها نزلت.
في الأول مكنش قصدي أستغلها بس كل مرة كنت بقول آخر مرة.
نظرت لي.
ولقيت نفسي بعد أربع سنين مش قادرة أوقف.
سكت المكان.
لكن المفاجأة إن أحمد مشي ناحية الباب.
قلت
أحمد؟
وقف.
