حكايات مني السيد
أنا عندي 31 سنة، متجوزة وعايشة في بيت عيلة، وأم لطفلين، وحامل في طفل تالت لا كان في الحساب ولا في الترتيب، حملت عليه وأنا باخد وسيلة لمنع الحمل. من يوم ما عرفت بالخبر وأنا حاسة إن الدنيا كلها بتضيق في وشي مرة واحدة.
جوزي شغال وأنا كمان بنحت في الصخر عشان نسند البيت. بدأت أدي دروس خصوصية للأطفال هنا، ودي القشة الوحيدة اللي سترانا لحد آخر الشهر وبنعرف نجيب منها شريط علاج لو حد سخن. إحنا عايشين في أرياف، المادة ب 75 جنيه في الشهر، والأهالي بتماطل وتطلع عيني على ما تدفعها.
يومي بيبدأ من 9 الصبح وبفضل شغالة وواقفة على حيلي لحد 7 بالليل، ومعايا ولدين… واحد 3 سنين والتاني 4 سنين. طول النهار محتجزة بين الحصص والطلبة والطلبات، وأنا أصلاً حامل وعضمي مش شايلني.
المشكلة الكبيرة إن عيالي لحم رخيص بيجوعوا قدام عيني.
أبقى واقفة بشرح والباب مقفول، وسامعة ابني الصغير بيعيط برا ماما.. جعان.. بطني بتوجعني.
أخرج أمد إيدي من ورا الباب معلش يا حبيبي، ثانية واحدة وهعملك تاكل.
بس الثانية دي بتجر ساعات.
مبقدرش أسيب المجموعة وأدخل أطبخ، فبجيب لهم عصير، باكو بسكوت، كيكة… أي مسكنات تسكت بطونهم لحد ما اليوم يخلص. وأفضل حابسة الدمعة في عيني وعارفة إن ده مش أكل يربي عيال.
ولما بخلص الساعة 7 بكون منهارة، أقعد نص ساعة أتنفس، وأدخل المطبخ أطبخ بالعافية، على ما الأكل يجهز تكون الساعة دخلت في 8 أو 9 بالليل.
والله العظيم عيالي من كتر الجوع والتعب يدخلوا يناموا ويشدوا المخدة يغطوا بيها وشوشهم عشان يهربوا من الجوع، والمنظر ده بيحرق دمي وقلبي كل ليلة.
كنت بحاول أنزلهم لحماتي وقت الغداء تاخدهم في حضنها وتأكلهم، كنت بقول في سري حتى لو ملوخية بايتة، لو شوية فول، أي لقمة تسندهم.
في الأول كانت بتستقبلهم، بعدين بقت يدوب ربع ساعة وألاقيهم طالعين بيصرخوا.
أسألها، تقولي ببرود هما اللي بيزنوا وعايزين يطلعوا، أنا مالي؟
لحد ما العيال نفسهم كرهوا ينزلوا وبقوا يقولولي مش عايزين ننزل تحت.. تيتة بتضربنا ومش بترضى تأكلنا!
سكت وبلعت الإهانة عشان مش ناقصة وجع دماغ ومشاكل في بيت عيلة، وفوق كل ده حمايا عارف ظروفنا المهببة وبياخد مني كل أول شهر 500 جنيه مساعدة عافية، والفلوس اللي بتدخل مفيهاش أي بركة.
شغالين إحنا الاتنين ومستورين بالعافية، وكل شهر ديون وخراب مستعجل تليفون يبوظ، شاشة تتحرق، دواء يتطلب… الفلوس بتدخل من هنا وتطير في الهوا من هنا.
أقول لجوزي اتحرك يا ابن الناس، دور على شغلانة تانية بمرتب كويس أنا جسمي اتدمر ومبقتش قادرة!
يرد ببرود يفرس أنا عندي 36 سنة، مين هيشغلني؟
أرد عليه بقهر وأنا عندي 31 سنة، واللي يشوفني يقول معدية الستين من الهم!
وفي اليوم ده، بعد ما خلصت آخر مجموعة الساعة 7، دخلت المطبخ ورجلي مش شيلاني.
فتحت التلاجة…
ملقتش فيها غير إزازة ماية وقالب جبنة قديمة ناشف، مفيش لقمة تتاكل.
بصيت ورايا، لقيت يوسف وسيف قاعدين على الأرض في الصالة وساندين ضهرهم للحيطة، وعينهم عليا مستنيين الأكل.
الكبير بصلي بصوت مكسور ودموعه في عينه ماما… هو النهارده كمان مفيش عشا؟
الكلمة نزلت على دماغي زي مية النار، اتجمدت مكاني ومعرفتش أرد، وقبل ما أنطق بحرف، سمعت صوت جوزي طالع من أوضة النوم وهو بيتكلم في التليفون بصوت واطي ومرعوب.
قربت من غير صوت ووقفت ورا الباب، وسمعته بيقول
أيوا يا أمي… أنا لازم أتصرف في الفلوس دي قبل ما هي تعرف، لو عرفت إني مضيت على وصولات الأمانة دي عشان أستر الموضوع ده هتخرب البيت وتسيبني!
رجلي اتسمرت في الأرض، والدم هرب من عروقي، وحسيت ساعتها إن المصيبة اللي دخلت بيتنا مش فقر ولا جوع… المصيبة أكبر وأبشع من كل اللي عشته.
فضلت واقفة ورا الباب، ضهري لازق في الحيطة ورجلي كأنها اتغرست في أرضية الطرقة ومش قادرة أرفعها شبر واحد. الدم هرب من وشي، والنَفَس بقى يخرج من صدري بصوت حشرجة مكتومة زي اللي بيغرق في شبر مية.
وصولات أمانة؟! وموضوع إيه اللي بيتستر عليه؟!
الكلمات كانت بتلف في دماغي زي السواقي. كل مشهد عشته في البيت ده عدى قدام عيني في ثانية واحدة… شقايا من تسعة الصبح، رجلي اللي بتورم من الوقفة قدام العيال، ال ٧٥ جنيه اللي بلمها بالعافية قرش ينطح قرش، ال ٥٠٠ جنيه اللي حمايا بياخدهم أول الشهر كأنه بيقلبني عافية واقتدار، عيالي اللي بيناموا وجعانين وبيغطوا وشهم بالمخدة عشان ميعيطوش قدامي… كل ده مر قدام عيني وشريط شقايا كله اتعرض في لحظة واحدة.
صوت جوزي محمود كان واطي، بس الفحيح اللي خارج من بين سنانه كان واصل لودني بوضوح يرعب
يا أمي افهميني بس! الراجل مديني مهلة لآخر الأسبوع، لو مجبتش أول قسط هيشتكيني ويوصل الوصولات للقسم، وساعتها مش هتبقى فضيحة سجن بس، دي هتبقى خراب بيوت على الكل!
سمعت صوت حماتي من الناحية التانية، نبرتها كانت باينة رغم المسافة
وطي صوتك يا غبي لا تسمعك المخروبة اللي عندك! اتصرف، شوف هتاخد من فلوس دروسها، قولها أي حجة، شاشة تانية باظت، تصليح الموتور، أي داهية، المهم تسد الباب ده عشان أخوك ميروحش في داهية!
هنا… الصدمة التانية نزلت على دماغي زي الحجر. أخوه؟! إبراهيم؟! إبراهيم العاطل اللي مقضيها قهاوي وسهر، اللي طول النهار لابس نضيف وراشش ريحة ومبيحطش في البيت نكلة، ومامته شايلاه على كفوف الراحة وتطبخ له الحمام والبط، في الوقت اللي بتطرد فيه عيالي بشوية ملوخية بايتة وتضربهم لو طلبوا لقمة؟!
إيدي كانت بتترعش وأنا ماسكة مقبض الباب. حسيت بوجع الحمل بيضرب في ضهري وأسفل بطني، تقل غير طبيعي، ودوخة خلت الحيطان تلف بيا. كتمت بؤي بإيدي عشان مطلعش صوت صراخ يفضحه قبل ما أفهم كل حاجة.
رجعت لورا خطوة بخطوة لحد ما وصلت المطبخ. لقيت يوسف الصغير واقف على باب المطبخ، ماسك في طرف عبايتي وعيونه مدمعة
ماما… بطني بتوجعني أوي، إنتي بتعيطي ليه؟
نزلت لمستواه، قعدت على ركبي وضميته لحضني بقوة ودموعي نزلت مغرقة وشه وشعره. قلبي كان بيتقطع عليه وعلى أخوه سيف اللي نام من كتر الجوع وهو ساند راسه على الترابيزة الخشب المتهالكة اللي في الصالة.
حقك عليا يا نور عيني… حقكم عليا أنا، أنا اللي ظلمتكم وجبتكم في وسط الغابة دي.
قومت مسحت دموعي بسرعة. فتحت الدرفة القديمة، طلعت شوية دقيق كانوا باقيين في قعر الكيس، شوية ماية ورشة ملح، وعجنتهم بإيد بتترعش على البوتاجاز… عملت لهم فطيرتين ناشفين على الطاسة من غير سمنة ولا زيت، يدوب بس حاجة تسند صلبهم وتملا بطونهم الفاضية.
