حماتي برقت بعينيها وبصتلي بوقاحة
إنتي بتلوي دراعنا في عز المصيبة يا ندى؟! خلصي هاتي الفلوس الراجل هيفضحنا قدام خلق الله، وجوزك هيتجرجر في البوكس الليلة، وأخوه يروح في داهية!
بصيت لمحمود وهو قاعد في الأرض زي العيل الصغير، ماسك راسه بإيديه وبيترعش. قربت منه ونزلت لمستواه، مسكت كتفه وهزيته جامد
بصلي هنا يا محمود! ارفع عينك وبصلي! شقايا وصحتي وعمري اللي بيضيع عشان ٧٥ جنيه في الشهر، والعيال اللي نايمين على لحم بطنهم، مش هيروحوا هدر عشان تصرف على سهر أخوك وعربدته! عايزني أدفع من تحويشتي ومن فلوس الجمعية اللي طالعة من عيني ودم قلبي؟
محمود اتكلم وصوته مخنوق بالدموع والذل
أبوس إيدك يا ندى… ادفعي، سدي الليلة دي بس وبعدين نعمل اللي إنتي عايزاه، والله ما هنسالك الوقفة دي، بس أخلص من السجن والمصيبة دي الليلة!
مفيش حاجة اسمها بعدين! شروطي تتنفذ دلوقتي حالا وقدام أمك وحماك لما يطلع!
حماتي كانت هتتجنن وبتفرك في إيديها، وفجأة طلع حمايا بينهج على السلم، وشه أحمر وعروقه نافرة، دخل الشقة وزعق في محمود
قوم يا خايب، قوم يا اللي ضيعت نفسك وضيعت أخوك! الراجل تحت مش راضي يصبر للصبح، بيقول لو أول قسط والفوائد بتاعته مدفعتش الليلة، هيبلغ النيابة بالمشاجرة والتلاعب والوصولات اللي معاهم!
بص حمايا ليا وقال بلهجة أمر
وانتي واقفة تفرجي ليه؟ هاتي الفلوس اللي شايلاها فكي زنقة جوزك وأخوه بدل الوقفة دي!
ابتسمت بسخرية ومرارة، ووقفت في نص الصالة، عيالي كانوا مرعوبين في الأوضة، ويوسف باصص من ورا الباب وعينيه مليانة خوف.
الفلوس معايا هنا في البيت، بس على جثتي يخرج منها مليم أحمر إلا لما تسمعوا شروطي وتنفذوها كلمة بكلمة، والراجل اللي تحت ده يفضل يسمعكم وسيرتكم تبقى على كل لسان لو مش عاجبكم!
حمايا اتعصب وعينه جحظت
إنتي اتجننتِ يا بت؟ بتهددينا في بيتنا؟!
أيوة بهددكم! عشان ده مش بيت، دي مقبرة لصحتي ولعيالي! أولاً ال ٥٠٠ جنيه اللي بتاخدهم مني كل شهر يا حمايا، دي اتقطعت للأبد، ومش هتشوف مني ولا من محمود نكلة بعد النهاردة! ثانياً الشقة دي تتقفل علينا بمفتاح، محدش ينزل عيالي ولا يمد إيده عليهم، وأكلي وشربي ومصاريفي في بيتي، والدروس اللي بديها فلوسها لبيتي وعيالي بس، ومحمود ينزل يدور على شغل إضافي يسد بيه اللي باقي من ديون أخوه بعيد عني! ثالثاً إبراهيم يكتب تنازل عن نصيبه في أرض القيراطين اللي في البلد لمحمود تعويض عن الفلوس دي، والورقة دي تتكتب الليلة قبل ما أطلع مليم واحد من جيبي!
حماتي شهقت ولطمت على خدها
عايزة تاخدي أرض ابني يا حية؟! عايزة تلهفي شقا أبوه عشان كام ألف جنيه هتدفعيهم؟!
أرض ابنك دي بتمن حرية عيالك الاتنين! اللي هيهرب واللي هيتسجن! لو مش عاجبك، انزلي قولي للرجالة اللي تحت يشيلوا محمود، وابنك الصايع لما يمسكوه يلبس جنبه في القضية!
محمود زحف على ركبه ومسك في رجل أبوه
وافق يا يابا! وافق أبوس إيدك، إبراهيم أصلاً ضيع نص فلوس الأرض على صحابه، والراجل تحت مبيفهمش، هتحبس الليلة!
حمايا وشه بقى زي الجمر، بصلي بكره وغيظ عمره ما وراه لحد، وعرف إني حاطة السكينة على رقبتهم كلهم. بص لمحمود وقال بقهر
قوم هات ورقة وقلم… هكتبلك التنازل اللي هي عايزاه، بس ورحمة أبويا ما هعديلك العملة دي يا ندى، وهتشوفي هعمل فيكِ إيه بعد ما المصيبة دي تعدي!
أعلى ما في خيلكم اركبوه، الورقة تتكتب وتتمضي وبصمة حمايا وإقرار منه بصفته ولي الأمر لحد ما إبراهيم يجي يبصم، وساعتها الفلوس تخرج.
دقايق مرت كانت أطول من سنين، الورقة اتكتبت وإيد حمايا بتترعش من الغل، مضى وبصم عليها، ومحمود مسكها واداهالي. دخلت الأوضة، فتحت قعر الدولاب القديم، وطلعت الشقا اللي شقيته شهور من عرق جبيني، القرش اللي كنت شايلاه ليوم ولادتي ولعلاج العيال والزنقات السودة.
طلعت الفلوس وحطيتها في إيد محمود
انزل ادفع، وخلي في علمك… الجنيه ده طالع من دم قلبي، وأي حركة غدر تانية مش هتبقى ورقة وتنازل، هتبقى نهايتي ونهايتكم كلكم!
نزل محمود وحمايا يجورا على السلم، وفضلت حماتي واقفة على الباب، باصة ليا بعيون كلها شر وسم
فاكرة نفسك انتصرتي يا بنت الفقر؟ والله لادفعك تمن الليلة دي غالي أوي، ووريني بقى هتعيشي إزاي في البيت ده بعد ما لويتي دراع الرجالة!
رزعت الباب في وشها بكل قوتي.
سندت على الباب من جوا، وانهارت على الأرض أعيط بحرقة، عيالي جروا عليا وحضنوني، يوسف مسح دموعي بإيده الصغيرة وسيف كان بيعيط على عياطي.
حطيت إيدي على بطني، الوجع كان لسه موجود، بس كان لازم أتماسك عشانهم. قومت غسلت وشي، ودخلت عيالي في حضني على السرير وغطيتهم وناموا من التعب بعد الرعب اللي عاشوه.
الساعة بقت تلاتة الفجر… البيت كان هادي تماماً، والهدوء ده كان هدوء مرعب، زي الهدوء اللي بيسبق الإعصار.
محمود مرجعش الشقة فوق، فضل تحت عند أمه وأبوه.
وفجأة… شميت ريحة غريبة داخلة من تحت عقب باب الشقة. ريحة دخان تقيل، ومعاها صوت طقطقة خشب وسخونة بتملى الصالة…
قومت مفزوعة، فتحت باب الأوضة ولقيت النار ماسكة في الصالة من ناحية باب الشقة المقفول من برا بالمفتاح! وجنب النار كان فيه جردل جاز مسكوب، وصوت همس برة على السلم بيقفل الترباس الخارجي!
صرخت بأعلى صوتي وضميت عيالي لصدري وأنا شايفة النار بتقطع طريقي للباب…
الدخان الأسود كان مالي الصالة، والنار بتاكل في الخشب بتاع الباب بسرعة ترعب، وريحة الجاز المسكوب بتخنق النفس لدرجة إني مكنتش قادرة أفتح عيني.
صوت سيف ويوسف وهما بيصرخوا ورايا في الأوضة قطع قلبي
