ماما! بنموت يا ماما.. النار!
الأمومة في اللحظة دي اتحولت لوحش جوايا. كل وجع الحمل والتعب والنزيف اتبخر في ثانية، وبقى عندي طاقة غريبة معرفش مصدرها إيه. جريت على الحمام، شديت البطانية التقيلة اللي كنا بنغطي بيها العيال، رميتها تحت الحنفية لحد ما شربت مية وبقت تقيلة زي الحجر.
لفيت سيف ويوسف في البطانية المبلولة، وشيلت واحد على دراعي والتاني ماسك في رقبتي بكل قوته، وجريت بيهم ناحية بلكونة المطبخ الخلفية اللي بتبص على الزقاق الضيق ورا البيت.
الباب الرئيسي كان مقفول بالترباس من برا، والنار محاصراه تماماً.. اللي عمل العملة دي كان قاصد نتحرق جوة وميطلعش لينا صوت.
فتحت شباك البلكونة وصرخت بأعلى ما في حسي
إلحقوووونا! البيت بيولع! يا أهل الحارة إلحقونا بنموت أنا وعيالي!
الصراخ شق سكون الفجر في القرية. في دقايق معدودة، بدأ الشباب والجيران يتجمعوا في الزقاق تحت، وشافوا ألسنة اللهب والدخان خارجين من شبابيك الشقة.
اصبري يا أم يوسف! متطبيش العيال.. هنجيب السلم حالا!
الناس في الريف في اللحظات دي بتتحرك في ثواني. جابوا سلم خشب طويل بتاع عمال الكهربا، وطلع اتنين من شباب الحارة، كسروا حديد البلكونة وشالوا مني سيف ويوسف الأول ونزلوهم، وبعدها سحبوني بالعافية وأنا حاسة إن روحي بتتسحب مني.
أول ما رجلي لمست أرض الزقاق، الصالة جوا طرقعت وصوت إزاز الشبابيك اتكسر من شدة النار. الجيران كانوا بيجروا بجراكن المية وخراطيم الطلمبات، كسروا باب البيت تحت وكسروا باب الشقة فوق عشان يطفوا الحريقة قبل ما تمسك في باقي العمارة.
قعدت على الأرض في الزقاق، حاضنة يوسف وسيف وببكي بهستيريا، وشي ممسوح بالسواد والكحة هدت حيلي.
وسط الزحمة والهرج والمرج، ظهر حمايا ومحمود من مدخل البيت تحت.. وشوشهم كانت مخطوفة، بس نظراتهم لبعض مكنتش نظرات ناس مفزوعة من حريقة، كانت نظرات خوف من الفضيحة!
حماتي طلعت وراهم وهي بتلطم بمياعة وتصرخ في الشارع
يا خرابي! شقة ابني ولعت.. عين وصابتنا يا ناس! عين وحسد عشان ابني فك زنقته!
وقفت على حيلي بالعافية، وزقيت إيد الستات اللي كانوا بيسندوني، ومشيت ناحيتهم وسط الدايرة اللي ملمومة من أهل البلد كلهم.
بصيت لمحمود اللي كان وشه في الأرض، وبصيت لحمايا وحماتي، وشاورت بإيدي اللي كانت محروقة ومهببة بالسواد على مدخل العمارة
عين وحسد يا ولية؟! عين وحسد هي اللي جابت جردل الجاز ودلقته من تحت عقب الباب وقفلت الترباس من برة بالمفتاح عشان نتحرق أنا والعيال اللي في بطني واللي في حضني؟!
الشارع كله سكت فجأة.. الصوت هدي والناس كلها برقت بصدمة.
واحد من كبارات البلد اللي كانوا بيطفوا الحريقة فوق نزل على السلم، وكان ماسك في إيده جردل بلاستيك أزرق سايح نصه من النار وفيه بواقي جاز، وقال بصوت عالي سمعه الكل
الكلام ده مظبوط يا جماعة.. الحريقة بفعل فاعل، الجاز مدلوق عند عتبة الباب، وترباس الباب الخارجي كان مقفول بقفل حديد من برة، إحنا كسرناه بالعتلة عشان ندخل!
وش حمايا بقى زي الميتين، وحماتي لسانها اتشل ومقدرتش تنطق بكلمة.
محمود جري عليا وحاول يمسك إيدي وهو بيترعش
ندى.. والله العظيم ما أعرف حاجة، أنا كنت نايم تحت ومحستش بحاجة!
زقيته بكل قوتي ووقعته في الأرض قدام كل رجالة البلد
إنت أرخص وأجبن من إنك تكون راجل أو أب! الفلوس اللي خدتوها عشان تستروا على ابنكم الحرامي مكانتش كفياكم.. كنتوا عايزين تحرقوني عشان تاخدوا ورقة التنازل عن الأرض وعشان ترتاحوا من شروطي؟!
طلعت الورقة المتطبقة من صدري، كانت مبلولة ومتبهدلة بس إمضاء حمايا وبصمته باينين فيها، ورفعتها قدام شيخ البلد والناس
الورقة دي تمن شقايا وتمن سد فضيحتهم، وبصمة حمايا عليها اهي.. والنهاردة الفجر كانوا عايزين يدفنوني أنا وولادي عشان يداروا وسخهم!
شيخ البلد قرب ومسك الورقة، وبص لحمايا بقرف وهز راسه
عيب الشوم عليك يا حج.. توصل للغدر بولاد ابنك ومرات ابنك الحامل عشان قرشين وأرض؟! دي ميعملهاش كافر!
حمايا بلع ريقه وصوته كان بيقطع وهو بيحاول يدافع عن نفسه
يا جماعة اسمعوني بس.. البت دي بتتبلى علينا وعايزة تخرب البيت، ده جردل الجاز بتاع الماتور مرمي على السلم من أسبوع، والنار مسكت فيه بالغلط!
في اللحظة دي، سمعنا صوت كلاكس عربية نص نقل وقفت فجأة على أول الزقاق، ونزل منها تلات شباب غراب عن البلد، ومعاهم واحد رابط راسه بشاش ووشه مليان كدمات.
أول ما نزلوا، واحد منهم شاور على حمايا ومحمود وزعق بصوت جهوري
هما دول يا رجالة! هما دول أهل النصاب اللي باع العربية بعقود مزورة واختفى بالفلوس!
الراجل اللي رابط راسه قرب ودخل وسط الزحمة ورمى شنطة سودا على الأرض تحت رجلين محمود، وقال بغل
أخوك إبراهيم فكر إنه هيهرب بفلوسنا ويسيبك لابس الوصولات.. جبناه من المخبأ بتاعه وكسرنا عظمه، والشنطة دي فيها كل العقود والوصولات القديمة اللي أبوك وأخوك ماضيين عليها لتجار تانيين في المركز! العيلة دي كلها شبكة تلاعب وماشية تبلف في الناس!
