وصل يوم الجمعة الموعود.
الجو كان مغيم سنة، ومكتوم. طارق صحي لقى نور لابسة عباية سودا شيك، وحاطة طرحة خفيفة، وشكلها واثق وهادي جداً، وماسكة في إيدها شنطة جلد سودا تقيلة.
يلا عشان منتأخرش على ماما، إنتِ عارفة بتزعل لما بنتأخر عن الغدا طارق قالها وهو بيلبس ساعته وبيبص في المراية برضا.
يلا، أنا جاهزة قبلك كمان قالتها وهي بتفتح باب الشقة.
نزلوا وركبوا العربية. طارق مد إيده عشان يسوق، نور بصتله وقالت
لا، اركب إنت جنب السواق النهاردة، أنا اللي هسوق.
إيه الحكاية يعني؟ هو إنتِ بقيتي مسيطرة كده فجأة ليه؟
مش مسيطرة، بس المشوار النهاردة مشاويره تابعة ليا أنا، ومحتاجة أبقى مركزة على الطريق.
سكت ومحبش يعمل مشكلة، ركب جنبها، وطول الطريق في محور صفط اللبن كان عمال يرغي عن مشاريع وهمية مع صحابه وعن إن إخواته محتاجين سلفة تلاتين ألف جنيه عشان يبدأوا براند ميكب أونلاين، ونور كانت بتهز راسها في صمت، وتبص في المراية اللي قدامها.
وصلوا العمارة في الهرم. عمارة قديمة واسعة، شقة الدور التاني.
دخلوا، لقت الست نادية قاعدة على كرسيها المفضل في الصالة، قدامها التليفزيون، وفريدة ونورهان قاعدين ماسكين الموبايلات وعلب المكياج مفرودة على ترابيزة الصالون بيجربوا ألوان الروج.
أهلاً يا طارق يا حبيبي.. اتأخرتوا ليه كده؟ المحشي برد جوة، ونور مكنتش هنا تسخنه الست نادية قالتها بعتاب ونظرة باردة لنور.
فريدة رفعت عينيها
كويس إنكم جيتوا، طارق بالله عليك كلم بتاع أوبر اللي متسجل عندك يجيلنا بليل، أصلاً الأبلكيشن عندي مهنج ومحتاجين نلحق الكوافير قبل الساعة خمسة، وضوافرنا لسه مكملتش ال Touch up بتاعها.
نور مقعدتش. فضلت واقفة في نص الصالة، الشنطة السودا في إيدها، وبصت للكل واحد ورا التاني.
اقعدي يا نور مالك واقفة زي الغريبة كده ليه؟ طارق قالها وهو بيقعد جنب أمه.
في اللحظة دي، سمعوا صوت دوشة وخبط تقيل على باب الشقة من برة، وصوت أنفاس رجالة شايلة حاجة تقيلة وبتنهج على السلم.
الست نادية اتخضت
مين اللي بيخبط كده؟! في إيه برة يا طارق؟ شوف مين بيعمل الدوشة دي على بابنا!
نور اتحركت بخطوات هادية ناحية الباب، وفتحته على آخره.
كانوا أربعة عمال شيالين، عرقانين، وشايلين بالعافية سرير حديد ضخم بتاع مستشفيات، بمفصلات بتزيق، لونه رمادي مقشر، ومترب من النقل، وحاطين فوقه مرتبة قطن قديمة متهالكة.
ندخل فين يا أستاذة؟ كبير العمال سأل وهو بيمسح عرقه بكُم القميص.
نور شاورت بإيدها على نص صالة الضيوف، قدام نيش الست نادية، وقدام تربيزة الميكب بتاعة التوأم
هنا.. نزلوه هنا في نص الصالة بالضبط.
طارق وقف مفزوع، وشه مخطوف
إيه القرف ده؟! إيه اللي أنتوا مدخلينه شقة أمي ده؟! إنتِ اتجننتي يا نور ولا جرى لمخك إيه؟! مين جاب السرير ده هنا؟!
نور وقفت جنب السرير الحديد، حطت إيدها على الماسورة الباردة بتاعته، وبصت لحماتها وبناتها اللي بقوا مبرقين ومفتوحين البق من الصدمة، وقالت بصوت هادي جداً بس كل كلمة فيه كانت بتنزل زي المرزبة
مش ده السرير اللي كنتوا فاكرين إني هفضل نايمة عليه وأنا بتهان وبمسح جزمكم؟.. لا يا حماتي، السرير ده مش ليا.. السرير ده جاي عشانكم، عشان القعدة الجاية مش هتبقى في صالونات..
فتحت الشنطة الجلد، وطلعت رزمة ورق أبيض A4 مطبوع بكشوفات الحسابات الرسمية ورمتها فوق السرير الحديد، وطلعت مفاتيح العربية وحطتها في جيب عبايتها.
ده كشف الحساب.. ودلوقتي، هنقعد نقرا كل قرش دخل البيت ده، ونعرف مين اللي هيدفع تمن السنين دي كلها.
الجزء الثالث والأخير
صوت تزييق مفاصل السرير الحديد وهو بينزل على أرضية الصالة كان كفيل يخرّس الشقة بالكامل.
العمّال نزلوا السرير بتقل، مسحوا عرقهم، وأخدوا الحساب من نور اللي كانت بتطلع الفلوس من شنطتها بعدّ هادي وبطريقة تخلي الأعصاب تفرقع. قفلت الباب وراهم وراهنت بضهرها عليه لثواني، كإنها بتقفل باب الخروج على كل اللي جوة.
الست نادية كانت حاطة إيدها على صدرها، وشها مخطوف ولونه قالب أصفر ليموني، وعينيها رايحة جاية بين السرير المتقشر المترب اللي اتحط في نص سجاد الصالون العجمي، وبين كومة الورق الأبيض اللي مرصوصة عليه.
طارق؟ فاكر لما أبويا عيي بكانسر الكبد من تلات سنين؟ فاكر لما طلبت منك ننقله مستشفى نضيفة في الدقي،
قولتلي إيه؟ قولتلي العين بصيرة والإيد قصيرة ومفيش سيولة، ومستشفيات الحكومة زحمة، خليه في سرير المستلزمات الطبية ده في البيت والموت علينا حق ومتبذريش في علاج ملوش رجا.
سكتت لحظة، الصمت كان أتقل من جبل على كتافهم. السرير ده كان مرمي في مخزن عمارتكم تحت من يوم ما أبويا مات. سيبتوه يصدي تحت مع الكراكيب. أبويا مات على السرير ده عشان مكنش في سيولة تكفيه، في نفس الشهر اللي كان في سيولة تسفر الهوانم شرم الشيخ أسبوع عشان نفسيتهم كانت تعبانة من التكييف في الصيف!
طارق بربش، صباعه نزل بالراحة، والتوتر بدأ يظهر في رفة عينه ده.. ده كلام قديم.. إنتِ جاية تفتحي دفاترك القديمة دلوقتي ليه؟ وبعدين ده نصيبه وده عمره! إيه علاقة ده باللي بنعمله؟!
نور شدت الورق الأبيض من على السرير، ورمت أول دستة على ترابيزة الصالون، الكوبايات اتهزت وعلب الميكب وقعت على الأرض. علاقة ده؟ الدفاتر مش قديمة يا طارق.. الدفاتر طازة، ومختومة، ومطبوعة من البنك المركزي ومن الشؤون القانونية للشركة بتاعتي.
نور قعدت على السرير الحديد بكل برود، كإنها قاعدة على عرش، حطت رجل على رجل، ومسكت أول ورقة اقعدوا.. عشان القعدة شكلها هتطول، وفاتورة الحساب هتبقى حامية على قلبكم شوية.
نورهان بصت لأختها، وحاولت تتكلم بنبرة استعلاء بس صوتها كان بيتهز إنتِ هتعمليلنا فيها المحقق كونان؟ فلوس إيه وبتاع إيه؟ طارق هو اللي بيصرف على البيت ده من عرق جبينه، إنتِ أصلاً دخلك ده ملناش دعوة بيه، وأخونا مش مأثر معانا، ملكيش فيه أصلاً!
نور بصت لنورهان بابتسامة صغيرة، نظرة شفقة خلت البنت تبلع ريقها عرق جبينه؟ حلوة دي.. طارق شغال مهندس صيانة في شركة خاصة، مرتبه الصافي في الشهر تسعة آلاف جنيه. تسعة آلاف جنيه يا نورهان.
لفت نور وشها لحماتها ابنك مرتبه تسعة آلاف.. الشقة اللي إحنا قاعدين فيها إيجارها أربعة آلاف وخمسمية، وأقساط جمعيته تلات آلاف. يعني اللي بيتبقى من طارق ابن الأصول لجيبه هو شخصياً ألف وخمسمية جنيه، يدوب بيكفوا بنزينه وسجايره وكوبايتين الشاي على القهوة.
الست نادية بصت لابنها بصدمة طارق.. الكلام ده بجد؟ إنت مش قايلي إنك بقيت مدير قسم وبتاخد تلاتين ألف؟!
طارق عينيه كانت في الأرض، مش قادر يبص لأمه ولا قادر يبص لنور. الكدبة اللي كان باني عليها برستيجه قدام عيلته كانت بتنهار طوبة طوبة.
نور رفعت الورقة التانية التلاتين ألف اللي كانوا بيتصرفوا هنا كل شهر، ده كان مرتبي أنا. مرتبي كمديرة حسابات، وبونص الميزانيات، وفلوس الجمعيات اللي كنت بقبضها من شقايا وتمرمطتي في المترو والميكروباصات عشان سيادته ياخد العربية يوصلكم الكوافير والنوادي.
رمت الورقة في حجر فريدة كورس الأبراج وعلم الأرقام؟ اتدفع من حساب كارت المشتريات بتاعي.. عملية رقم ٤٩٢٠. رمت ورقة تانية في حجر نورهان بوت زارا اللي بسبعة آلاف؟ اتدفع من تحويل إنستاباي من تليفوني وأنا نايمة وهو عارف الباسورد.. عملية رقم ٨٨١٣. بصت للست نادية تلاجة شارب ال ١٨ قدم اللي في مطبخك؟ متقسطة على كارت البنك بتاعي باسم نور عزت، ولسه فاضل فيها تمن شهور بدفعهم من دمي!
الست نادية لسانها اتعقد، عنيها كانت بتتحرك بسرعة بين الأوراق اللي بقت مالية الصالة. الست اللي كانت داخلة عليها بصفة الحماة القوية اللي بتتحكم في كل فتفوتة، ظهرت فجأة زي ست عجوزة ومكسورة بتكتشف إن العز اللي هي عايشة فيه كان مبني على دم وسرقة.
طارق صرخ، صرخة راجل اتقفش متلبس وعريان قدام أهله بس بقى! كفاية سم بقى يا نور! ما البيت بيتك وإحنا واحد، إيه الفرق بين فلوسي وفلوسك؟! هو مش الجواز مشاركة؟! ولا إنتِ مكنتيش عايشة في بيتي وبتاكلي من أكلي؟!
نور قامت ووقفت قدامه، والمسافة بينهم مكنتش أكتر من شبر واحد. عينيها كانت حادة، مفهاش ذرة تردد الجواز مشاركة لما نكون بنبني بيت مع بعض.. مش لما أكون أنا الحمار اللي بيشد الساقية وإنت وأهلك قاعدين تاكلوا في التبن وتتمنظروا باللبس والضوافر! المشاركة لما تيل الفرامل اللي كان هيموتنا يتغير، مش لما تقولي معيش فلوس وأجليه، وفي نفس اليوم تدفع ألف ونص لضوافر إخواتك عشان ميتقصفوش في المسح!
طلعت نور مفاتيح العربية من جيبها، ورفعتها قدام عين طارق المفاتيح دي.. مبتخصكش بعد النهاردة. طارق حاول يمد إيده ياخدهم دي عربيتي! أنا اللي دافع أقساطها!
نور ضحكت بمرارة رخصتها باسمي، والعقد المسجل باسمي، وأبويا دافع تلات ترباع تمنها، وإنت بتوكيلك كنت بتسوقها. التوكيل اتلغى في الشهر العقاري النهاردة الصبح يا باشمهندس، وبلاغ اتعمل في المرور بسحب التوكيلات. لو حطيت مفتاحك في كونتاكت العربية دي، هتبات في القسم بتهمة خيانة أمانة وسرقة عربية مسجلة.
طارق حس إن الأرض بتتهز تحته، الرعب بدأ يتسلل لصوته، النرجسية اللي كانت بتغذيه بدأت تتكسر وتتحول لذل نور.. اهدي، مينفعش الكلام ده قدام أمي وإخواتي.. تعالي نروح بيتنا ونتكلم براحة، كل حاجة هتتحل.. متخربيش بيتك بإيدك عشان شوية مصاريف!
