طفلة زوجي ..حكايات زهرة
فجأة لقيت فاليري بتطلع موبايلها وبتحاول تصور لايف أو تعمل شوشرة، ضحكت بصوت عالي وقلت لمراد شغل ميكروفونات الجنينة البرانية يا مراد.. خليني أقولهم كلمتين أخيرة.
صوتي طلع في الشارع كله، هادي ورزين بس بيقطع زي السكين يا فاليري هانم، التصوير مش هيفيدك، والشرطة لو جت هتاخدك أنتي بتهمة الاعتداء، الكاميرات مسجلة القلم اللي أديتيهولي ومسجلة كل كلمة قلتيها.. والفيلا دي ملكي بالقانون، يعني وجودكم على الرصيف ده هو مكانكم الطبيعي من البداية. لو شفت وش حد فيكم في محيط المنطقة دي تاني، هرفع قضية تعويض تخلص على اللي فاضل في حساباتكم.
أبويا بص للكاميرا وكأنه شايفني، وشفايفه اتهزت بكلمة سامحيني، بس أنا قلبي كان خلاص بقى حجر. قفلت الميكروفون وقلت لمراد كلم المحامي يجهز ورق قضية التعدي، وعايزة الفيلا دي تتنضف وتترش، مش عايزة ريحة الناس دي تفضل هنا.. والدهب اللي رماه الحراس بره ده يلموه، مفيش حاجة تطلع من هنا غير وهما لابسينها بس.
طلعت أو، ضتي اللي فوق، الأو، ضة اللي كانت فاليري مانعاني أدخلها وتقولي دي أوضة خزين، ودلوقتي بقت جناحي الملكي. نمت على السرير وأنا حاسة إن النفس اللي طالع وداخل بقى خفيف، مفيش حمل على صدري، مفيش ذل ولا كسر خاطر.
تاني يوم الصبح، صحيت على خبر في الجرايد والصفحات عن فضيحة فرح ابنة رجل الأعمال المنصوري، والكل كان بيسأل مين صاحبة الفيلا الغامضة اللي قلبت الفرح مأتم. قفلت اللابتوب ولبست العقد الزمرد بتاعي، ونزلت الجنينة أشرب قهوتي في هدوء
. الشمس كانت طالعة والجو جميل، ولأول مرة من عشرين سنة، حسيت إن فيلا المنصوري أخيراً بقى فيها روح.. روحي أنا.
عدى أسبوع على الليلة دي، والهدوء اللي في الفيلا كان هو المكافأة اللي كنت مستنياها طول عمري. موبايلي مكنش بيبطل رن من أرقام غريبة، قرايبنا اللي مكنوش بيفتكروني حتى في العيد، بقوا دلوقتي بيبعتوا رسايل اطمئنان وعايزين ييجوا يزوروني.. طبعاً كلهم كانوا بيدوروا على مصلحتهم عند الهانم الجديدة.
في يوم الصبح، مراد جالي وقالي إن أبويا واقف على البوابة ومعاه شنطة صغيرة وطالب يقابلني دقيقة واحدة بس. ترددت لحظة، بس قلت خليه يدخل.. عايزة أحط النقط على الحروف لآخر مرة.
دخل المكتب، كان باين عليه إنه كبر عشر سنين في أسبوع واحد، ظهره انحنى وعينيه مطفية.
قعد قدامي وهو مش قادر يحط عينه في عيني، وقال بصوت مرعوش أنا طلقت فاليري يا إيلين.. وخدت نيرة ورجعنا شقتنا القديمة بتاعة زمان. أنا مكنتش أعرف إنك شايلة كل ده في قلبك، ومكنتش أعرف إنك أنقذتيني من السجن.
بصيت له بمنتهى الهدوء وقلت له أنا منقذتكش عشان سواد عيونك يا بابا، أنا أنقذتك عشان اسم
أمي ميتمرمطش في المحاكم بسبك.. وعشان الفيلا دي كانت حلمها هي، مكنتش هسمح لغريبة زي فاليري تتهنى بيها وأمي ماتت وهي بتحلم بركن فيها.
طلع من جيبه ظرف وحطه على المكتب ده مبلغ بسيط كنت شايله للزمن، خليه معاكي.. وأنا مش جاي أطلب منك حاجة، أنا بس جاي أقولك إني هسيب البلد وأروح أعيش في البلد عند أهلي، مش قادر أواجه الناس بعد اللي حصل.
قمت وقفت وفتحت الشباك، بصيت على الجنينة اللي كانت فاليري بتهينني فيها وقلت له يا ريتك كنت بالقوة دي وأنا بتضرب قدامك.. السامح مش سهل يا بابا، والشرخ اللي عملته سنين الإهمال مش هيتصلح بكلمتين. سافر يا بابا، يمكن هناك تلاقي نفسك اللي ضاعت مع فاليري.
خرج أبويا من الفيلا وهو بيجر خيبته وراه، وأنا وقفت أتفرج عليه لحد ما اختفى. في اللحظة دي، حسيت إن الحكاية اتقفلت فعلاً. مفيش انتقام تاني، ومفيش وجع. رحت للمراية، شفت واحدة قوية، عينيها بتلمع بالتحدي، وخدي اللي اتجرح لحي تماماً بس ساب علامة صغيرة مبيشوفهاش غيري.. علامة بتفكرني كل يوم إن الضربة اللي متموتش، بتقوي.
رفعت سماعة التليفون وقلت لمراد جهز العربية يا مراد، عندي اجتماع مهم في الشركة.. الحياة لسه بتبدأ.
نزلت من الفيلا وركبت عربيتي، ومراد سايق بيا وسط شوارع القاهرة اللي كانت زحمة كالعادة، بس الزحمة دي مكنتش خنقاني المرة دي، كنت حاسة إني طايرة. وصلنا قدام برج إداري كبير، الشركة اللي كنت بديرها من ورا الستار طول السنين اللي فاتت، والنهاردة أول يوم هدخلها بصفتي إيلين المنصوري المالكة الحقيقية، مش مجرد موظفة استشارات مجهولة.
أول ما دخلت، الموظفين كلهم وقفوا صفين، الهمس كان مالي المكان، الكل عرف إن البنت اللي كانت بتدخل من الباب الجانبي بشنطة لاب توب بسيطة، هي نفسها اللي قلبت الدنيا الأسبوع اللي فات. دخلت مكتبي اللي كان بيطل على النيل، وقعدت على كرسي الجلد المريح، وغمضت عيني لحظة.
