كانت بتجبر أختي الحامل على أكل الأكل البايت حكـايات مني السيد حصري
مسكت البرطمان، كان تقيل، ولما فكيته قربته من مناخيري بحذر.
كانت ريحته نفاذة ومرة، شبه ريحة الكافور على عشب محروق، وجواه كبسولات متفرقة لونها رمادي باهت.
بس الكارثة مكنتش في البرطمان.. الكارثة كانت في شريط دوا متقصقص جنبه، قدرت أقرا حروف متفرقة منه ميث… تري….
أنا خريجة علوم، ودماغي ضربت أخماس في أسداس في ثانية واحدة.
شريط لمادة بتستخدم في أدوية الأورام وساعات بيتاخد بجرعات معينة في الحالات المستعصية، محطوط في درج واحدة حامل في السادس؟!
إيدي اتجمدت على الدرج، والتفتت أبص لدينا.
كانت قاعدة على حرف السرير، رجليها السخلانة بتترعش، وضامة كفوف إيدها على بطنها بحركة غريزية كأنها بتحاول تداري الجنين مني، أو من أم طارق، أو من الدنيا كلها.
دينا.. إيه ده؟ ده دوا إيه اللي بتاخديه؟
سألتها بصوت واطي ومبحوح وأنا بحاول مخليش صوتي يطلع برا الأوضة عشان الحية اللي واقفة في الصالة متسمعش.
دينا بصت للعلبة والبرطمان، وشها اللي كان مطفي أصلاً اتحول للون الجير، وشفايفها بدأت ترتجف من غير ما يطلع منها صوت.
عينيها وسعت برعب حقيقي، وهمست وهي بتبص للباب ده.. دي الحاجة إلهام هي اللي بتجيبه من عند دكتور أعشاب كبير في الحسين.. قالتلي دي تحصينة وتثبيت للواد، عشان مشيمتي كانت نازلة شوية في الرابع.. وبتحطهولي في كبسولات كل يوم مع كباية لبن دافية الصبح.. وبتقف فوق راسي لحد ما ابلعها.
لبن دافي؟ ومسألتهاش ده إيه يا دينا؟! الروشتة فين؟ الدكتورة ميرفت اللي بنتابع معاها شافت القرف ده؟!
دينا غطت وشها بإيديها وانفجرت في عياط مكتوم، كتفها بيتهز كله وهي بتشهق مروحتش لميرفت من شهرين يا مريم.. إلهام قالت لطارق إن الدكاترة دول بيعملوا سبوبة وبيخوفوا الستات ع الفاضي، وإن طارق مسحول في الشغل ومفيش داعي لمصاريف الكشوفات والسونار كل أسبوعين.. وقالتله أنا سقطت تلاتة قبلك وعارفة إزاي أحافظ على العيل.. وطارق.. طارق بيسمع كلامها في كل نفس بتتنفسه!
في اللحظة دي، سمعت خطوات تقيلة بتقرب من الباب، وفجأة الباب اترزع واتفتح لآخره.
الحاجة إلهام كانت واقفة على العتبة، عينيها مبقتش الست الطيبة ولا حتى المتصنعة؛ عينيها كانت بتطق شرار، وفي إيدها عصاية مقشة خشب رفيعة، كأنها داخلة تضرب عيلة صغيرة في الشارع.
إنتي بتنبشي في أدراج بيتي يا مريم؟ إنتي أمك معرفتش تربيكي قبل ما ترميكي في وشنا؟ سيبي اللي في إيدك ده حالاً!
صوتها كان جهوري ومستفز، طالع من بطنها بقوة تخض. قربت خطوة ناحيتي ومدت إيدها تخطف البرطمان، بس أنا كنت أسرع.
رميت البرطمان والشرائط في شنطة إيدي وقفلت السوستة بضغطة صباع حاسمة، ووقفت بينها وبين دينا.
ابعدي عننا يا ست إنتي.. الشنطة دي فيها بلاوي توديكي ورا الشمس، وأنا أختي خارجة معايا، وريني بقى هتعملي إيه!
الحاجة إلهام وشها احمر لدرجة العروق الزرقا اللي في رقبتها برزت، وصاحت توديني ورا الشمس؟! ده بيتي، ومرات ابني، وابن ابني اللي في بطنها! إنتي مين أصلاً عشان تدخلي تهجمي على البيت وتاخديها؟ ده خطف! والله لاطلبلك النجدة وأعملك محضر تهجم وسرقة يا بت انتي!
اطلبي النجدة! زعقت فيها بأعلى صوتي لحد ما حبالي الصوتية وجعتني، اطلبي النجدة دلوقتي وخلي الظابط يدخل يشوف الزبالة والعفن اللي بتأكليه لواحدة حامل، ويشوف المادة الضارة اللي بتسقيهولها في اللبن الصبح! يلا.. رني ع النجدة ومستنياهم أهو!
الكلمة نزلت عليها زي جردل مية متلجة. وقفت مكانها، ونظرتها اتهزت لثانية واحدة، بس ثانية كافية تفضح كل حاجة.
بلعت ريقها بالعافية، وقالت بنبرة حاولت تخليها أهدى بس مليانة سم مادة ضارة؟ أنتي اتجننتي رسمي.. ده تقوية للرحم.. ده شغل ناس قديمة إنتي وأشكالك متعرفوش فيه حاجة.. هاتي الشنطة دي بدل ما أفرّج عليكي العمارة كلها.
في وسط الزعيق ده، تليفوني رن بنغمة بابا. فتحت الخط والاسبيكر شغال مريم! إحنا تحت العمارة، في الدور الكام بالظبط؟ والبواب بيقول في خناقة فوق، أنتوا كويسين؟
سمعت صوت بابا الحاسم، وجنبه صوت ماما وهي مرعوبة وبتقوله اطلع يا عبد العزيز بسرعة. بصيت لإلهام بتحدي، وقولت في التليفون إحنا في الدور الرابع يا بابا، اطلع وكسر الباب لو لقيته مقفول.
إلهام لما سمعت صوت بابا بيتكلم بالجدية دي اتراجعت خطوتين لورا في الصالة. الباب مكنش مقفول بالمفتاح، وخلال أقل من دقيقة كانت خطوات بابا الرزينة وماما بتهز السلم الرخام.
بابا دخل الصالة، راجل ستيني بشعره الأبيض وملامحه الصارمة اللي دايماً بتفرض هيبتها في أي مكان، ووراه ماما بعبايتها وطرحتها الملهوجة ووشها مصفر من الخضة.
ماما أول ما شافت دينا قاعدة على طرف السرير بالمنظر ده، صاحت صرخة مكتومة وجريت عليها بنتي! يا لهوي يا دينا.. مالك يا ضنايا؟ وشك عامل كده ليه؟ إيه اللي حصلك؟!
دينا رمت نفسها في حضن ماما وبدأت تصرخ وتعيط بنحيب يقطع القلب، كأنها كانت ماسكة نفسها في سجن ومصدقت شافت باب الزنزانة بيتفتح.
بابا وقف في نص الصالة، بص لإلهام من فوق لتحت بنظرة خلت الست ترتبك وتلف الطرحة على كتافها إيه اللي بيحصل هنا يا ست إلهام؟ إيه المنظر اللي بنتي فيه ده؟ فين طارق؟
إلهام حاولت تسترجع سيطرتها، وعدلت وقفتها وحطت إيدها في وسطها أهلاً يا حاج عبد العزيز.. كويس إنك جيت بنفسك عشان تشوف قلة أدب بناتك. بنتك مريم دخلت تهجمت عليا وغلطت فيا في بيتي، وبنتك دينا الدلع ماسكها من أول يوم حمل ومش عاجبها عيشتنا، وعايزين يمشوا ويسيبوا البيت من غير إذن جوزها!
بابا مبصش حتى ناحية كلامها الفارغ، بصلي أنا مريم.. في إيه بالظبط؟
فتحت الشنطة، وطلعت علبة الأكل اللي رميتها، وطلعت شرايط الدوا والبرطمان وحطيتهم في إيد بابا دينا كانت بتتعرض للخطر بالبطيء هنا يا بابا. الأكل اللي بيتحط قدامها معفن وبايت، والست دي بتشربها دوا مجهول كل يوم الصبح بالعافية، وشريط الدوا ده خطير جداً ع الحوامل. دينا لازم تتنقل مستشفى فوراً نعملها غسيل معدة ونطمن على الجنين.. دينا مبتزدش في الوزن، دينا بتخس للنص!
بابا بص للبرطمان وللشرايط، وبعدين بص لإلهام، وكانت عينيه كفيلة إنها تسكت أي لسان. قال ببرود تقيل يخوف حسابنا بعدين يا إلهام هانم.. مش وقته دلوقتي.
ولف وشه لدينا قومي يا بنتي على حيلك.. لميتي حاجتك يا مريم؟
كله جاهز يا بابا.
ماما سندت دينا اللي كانت رجليها مش شايلاها، ومشينا في اتجاه باب الشقة. إلهام وقفت قدام الباب وحاولت تسده بجسمها والله ما أنتوا خارجين بيها إلا لما طارق يجي! ده ابني وده حقه، مش هتهربوا بعيلنا كده!
بابا قرب منها خطوة واحدة، وصوته كان واطي بس يرن زي الرعد وسعي من سكتي يا ست أنتي بدل ما أتصرف تصرف مش هيعجبك.. وطارق لما يرجع، خليه يحصلنا على المستشفى لو لسه باقي عنده ذرة رجولة ودم.
إلهام شافت الشر في عين بابا فرجعت لورا وهي بتبرطم وتتحسبن، وخرجنا من الشقة، ونزلنا السلالم بسرعة تحت نظرات الجيران اللي كانوا مواربين الأبواب على حس الزعيق.
ركبنا عربية بابا. دينا كانت نايمة في حضن ماما ورا، بتترعش ومش قادرة تاخد نفسها، وعرق بارد مغرق جبينها. بابا ساق بأقصى سرعة في اتجاه مستشفى دار الشفاء في مصر الجديدة، وأنا قاعدة جنبه قدام ماسكة تليفوني وبحاول اتصل بالدكتورة ميرفت استشارية النسا والتوليد اللي كانت متابعة حالة دينا في الأول.
ألو.. دكتورة ميرفت؟ أرجوكي الحقينا، إحنا في الطريق لمستشفى دار الشفاء حالا ومعانا دينا.. حالتها متدهورة جداً وشاكين في تعرض لمادة ضارة وجفاف حاد.
