كانت بتجبر أختي الحامل على أكل الأكل البايت حكـايات مني السيد حصري
وطارق كان واقف في النص، عيونه مبرقة وزايغة بين أمه المتكلبشة وبين بابا وماما اللي واقفين زي الصقور مش مخلينه حتى يلمح باب الأوضة اللي فيها دينا. طارق قرب من الظابط بصوت مهزوز يا فندم.. يا حضرة الظابط، دي أمي، ست كبيرة في السن ومريضة سكر وضغط، مينفعش تتكلبش كده، أكيد في سوء تفاهم.. عمي عبد العزيز، عشان خاطر العيش والملح اللي بينا، اتكلم وقول للظابط يفكها ونتفاهم في البيت!
بابا وقف قدامه، حط إيده في جيب البنطال، وبص في عينه بكل جبروت وصبر راجل مفحوت في الدنيا عيش وملح؟ العيش اللي أمك حطت فيه مادة ضارة لابنك ولأخت مريم؟! الملح اللي كبسته في بطن بنتي عشان يفرتك عروقها؟! أنت ملكش عيش وملح معانا يا طارق.. أنت ليك نيابة ومحكمة تقف قدامها وتقول للقاضي أنت كنت شريك مع أمك، ولا كنت مغفل ومغمي عينك عن اللي بيحصل تحت سقف بيتك!
في اللحظة دي، دخلت أنا والدكتورة ميرفت ووسطنا رئيس نقطة المستشفى، الرائد حسام.
يا فندم، التقرير الطبي المبدئي وشهادة الدكتورة استشارية النسا جاهزة، الدكتورة ميرفت سلمت الدوسيه الأزرق للظابط، الحالة فيها تعرض لمادة كيميائية متعمد بمادة الميثوتريكسات وارتفاع قاتل لنسبة الصوديوم في الدم، ومحاولة سابقة للرشوة للتلاعب في تقارير طبية رسمية بهدف إسقاط جنين أنثى.
طارق أول ما سمع كلمة جنين أنثى، وشه اتجمد كأنه اتضرب بقالب طوب. لف وشه لأمه ببطء مرعب، صوته طلع مخنوق ومش مصدق أنتي قلتيلي.. قلتيلي ولد.. قلتيلي نتيجة التحليل طالعة ولد، وعشان كده كنتي بتجيبي الأعشاب والتثبيت بنفسك.. أنتي كنتي عارفة إنها بنت؟!
إلهام سكتت فجأة عن اللطم، عينيها بصت لطارق بنظرة جافة وباردة خالية من أي أمومة، وقالتله بفحيح زي الأفاعي أيوة بت! بت يا طارق! عايز تفضل شقيان وتجيب بت تاخد شقاك وتورثك لولاد الغريب؟! عايز تخلف بنات وتوطي راسنا في البلد قدام عمامك؟! أنا ربيتك وكبرتك وعملتك راجل عشان تجيبلي حتة عيلة تكسر عيني؟ كان لازم تسقط، ولو مش هي اللي سقطت كان لازم تمشي وتغور في ستين داهية ونجيبلك مريم بت خالك اللي ضهرها مجيب للصبيان!
الطرقة كلها سكتت. حتى الممرضين والعساكر وقفوا باصين للست دي بذهول وقرف.
طارق رجع خطوتين لورا، ضرب بإيده على راسه كأنه بيفوق من كابوس استمر سنين، وبص لأمه بصدمة شلت لسانه أنتي.. أنتي كنتي بتعرضي بنتي للخطر؟ كنتي بتعرضي مراتي للخطر في بيتي وأنا زي الأعمى بصدق كل كلمة بتخرجيها من لسانك؟ ده أنا كنت بتخانق مع دينا عشانك! كنت بقولها أمي متغلطش وأمي بركة البيت!
يا بني آدم افهم! إلهام صاحت فيه وهي بتتجرجر من العساكر، أنا بعمل كل ده لمصلحتك! الغبية دي مش هتعيشلك صبيان، أنا حسيت بيها من أول شهر.. كنت بنضفلك بيتك من الخراب!
الرائد حسام شاور للعساكر بحزم على البوكس فوراً.. واعملوا حرز للشنطة والبرطمانات والشرايط اللي معاهم، وتبليغ النيابة العامة لتحقيق عاجل في الجنايات.
العساكر شدوا إلهام وهي بتصرخ وبتشتم فينا بأقذر الألفاظ، وصوت صريخها كان بيتردد على السلالم لحد ما باب البوكس اترزع تحت في الشارع.
ماما مقدرتش تمسك نفسها، قعدت على كرسي الطوارئ وغطت وشها بالطرحة وانفجرت في عياط هستيري حسبي الله ونعم الوكيل فيكي يا شيخة.. حسبي الله ونعم الوكيل.. كانت هتحرق قلبي على بنتي عشان خاطر بنت ولا ولد!
طارق قرب من بابا وماما، وشه كان شاحب زي الميتين، ركع على ركبه قدام بابا في نص الطرقة ومسك في بنطلونه عمي.. يا عمي عبد العزيز، أقسم بالله ما كنت أعرف حاجة! وحياة رحمة أبويا ما كنت متخيل إنها توصل لكده.. أنا كنت فاكرها خايفة عليها بجد.. أبوس إيدك خليني أشوف دينا، خليني أطمن عليها واعتذرلها تحت رجليها!
بابا سحب رجله بهدوء شديد، وبص لطارق من فوق بنظرة نهائية قوم اقف.. الرجالة مبتركعش في الطين بعد ما تضيع بيوتها بإيديها. سكوتك وجهلك كان هو السلاح اللي أمك ضربت بيه بنتي. لو كنت راجل بجد وفتحت عينك في بيتك، مكنتش مراتك وصلت للوزن ده والهلاك ده قدامك وتقول ده دلع حوامل.. ملكش مكان هنا يا طارق، والورقة اللي بينك وبين بنتي هتوصلك على يد محضر أول ما تخرج من المستشفى بالسلامة.
عمي لا! دينا مراتي واللي في بطنها بنتي! مش هطلقها، هعوضها عن كل لحظة!
بنتك دي.. لو عاشت.. مش هتشوف وشك ولا وش أهلك، قولتله أنا ودموعي بتلمع في عيني، أنت متستاهلش تكون أب، ولا تستاهل تكون سند لولا واحدة فينا. امشي من هنا بدل ما نخلي الظابط يضمك للمحضر شريك في الجريمة بتهمة الإهمال والاشتراك!
طارق بص في عيوننا، ملقاش ذرة رحمة ولا باب موارب للرجوع. قام وقف مكسور وضهره محني، وخرج من الطوارئ بخطوات تقيلة كأنه شايل كفنه بإيده.
في اللحظة دي، الممرضة خرجت من أوضة العناية وندهت علينا أهل المريضة دينا؟ المريضة بدأت تفوق وبتردد اسم أختها مريم وعايزة تشوفكم.
جريت أنا وبابا وماما على الأوضة.
دينا كانت نايمة، متركب في إيدها الشمال كانيولا موصولة بتلات محاليل، وعلى بطنها حزام جهاز النبض اللي كان بيطلع صوت منتظم وضعيف تك… تك… تك…
وشها كان لسه تعبان، بس لون شفايفها بدأ يرجعله شوية دم خفيف بعد المحاليل. أول ما شافتني، مدت صوابعها المرتعشة ومسكت في إيدي بقوة مفاجئة مريم.. بنتي عايشة؟ النبض ده بتاعها؟
نزلت على ركبي جنب السرير، بوست إيدها المليانة لزق طبي، وابتسمت من وسط دموعي عايشة يا حبيبة قلب أختك.. النبض ده بتاع بنتك.. بنوتة زي القمر وهتطلع قوية وشجاعة لخالتها وأمها.
