كانت بتجبر أختي الحامل على أكل الأكل البايت حكـايات مني السيد حصري
ماما شهقت لما شافتها وجريت ورا الحضّانة خطوتين يا حبيبتي يا بنتي.. يا حتة من كبدي يا صغيرة!
أنا فضلت واقفة قدام باب العمليات. النزيف مكنش وقف، ودينا لسه جوة مع المشرط وبنج التخدير وأكياس الدم اللي بتتعلق ورا بعضها.
في اللحظة دي، سمعت صوت جزمة جلد بتخبط على السيراميك بخطوات عصبية ومتقطعة من أول الممر. رفعت عيني، كان طارق راجع تاني.
طارق كان شكله متبهدل لدرجة تصعب على الكافر؛ قميصه الأبيض كان متوسخ وزرايره مقطوعة، وشه أسود من الكآبة وعينيه مورمة ومحمرة من العياط. كان ماشي ساند على الحيطة كأنه راجل في التسعين، ومعاه اتنين من خيلانه، الحاج فرج والحاج متولي، كبار عيلة إلهام في البلد، لابسين جلابيب صوف سودا وشيلان كشمير، ووشوشهم كلها غيظ وعبوس.
أول ما وصلوا عند الخط الأحمر، الحاج فرج قرب من بابا ومد إيده ببرود السلام عليكم يا حاج عبد العزيز.. كفارة إن شاء الله والشدة تزول.. إحنا جينا أول ما طارق بلغنا عشان نلم الدور ونسحب المحاضر دي عيب في حقنا وفي حق عيلتنا.
بابا مبصش لإيد الراجل الممدودة ولا حتى اعتبره موجود، فضل باصص لباب العمليات كأنه صخرة، وصوته طلع هادي وتقيل زي حد السيف إيدك دي خليها في جيبك يا فرج.. وإلزموا حدودكم عشان المكان ده مش مستحمل وساخة أهلك النهاردة.
الحاج متولي اتعصب واتقدم خطوة، راجل تخين وعصبي وبكرش كبير إيه الكلام ده يا راجل أنت؟! إنت فاكرنا هنقف نتفرج وأختنا الكبيرة وشيخة بيتنا محبوسة في حجز النقطة زي قطاع الطرق عشان خاطر دلع بناتكم وتهويل الحبالي؟! إحنا أصولنا تملى البلد، وإلهام ست صايمة مصلية متعملش اللي بتتبلوه عليها ده!
طارق هنا اتدخل وصوته كان مخنوق ومكسور، مسك دراع خاله متولي يا خالي اسكت أبوس إيدك.. متسخنش الدنيا، أنا شفت التحاليل بنفسي وسمعت كلام الدكتورة.. أمي غلطت.. أمي كانت هتدمرنا كلنا!
الحاج فرج ضرب طارق على كتفه بقسوة ورماه لورا اخرس يا طري! إنت أملك شوية نسوان ومسحوا بيك الأرض وبأمك اللي ربيتك عشان تطلع مهزوز كده؟! الست كانت عايزالك ولد يشيل طينك وعزك، دينا كانت داخلة علينا بفقرها وجايبة بنات تقطع خلفك، لو مش عاجبها تروح في ستين داهية والبلد مليانة بنات يرموا دهب تحت رجلك!
الكلمة دي كانت الشرارة اللي ولعت النار في البنزين.
بابا لف وشه ببطء، وفي حركة سريعة مكنتش اتخيل إن راجل في سنه يقدر يعملها، مسك الحاج فرج من ياقة جلابيته وشده عليه لدرجة إن وشوشهم خبطت في بعض، وصوته كان طالع زي فحيح الوحش بنتي اللي جوة دي بتنزف ومبين الحياة والموت بسبب مادة ضارة أختك العقربة.. وبنتها اللي وزنها ميكملش كيلو بتتحط على جهاز تنفس في الحضانة.. لو دينا جرالها حاجة، أو لو بنتها توفت.. قسماً برب العزة يا فرج، لكون دافنكم كلكم مكانها، والقانون اللي أنتوا مستهترين بيه ده هيخلي أختك تعفن في السجن المؤبد لحد ما تدود!
أمن المستشفى ورئيس النقطة الرائد حسام سمعوا الزعيق وجريوا فوراً في الممر، والعساكر دخلوا ببنادقهم فرقوا الرجالة عن بعض.
الرائد حسام وقف بين بابا وبين خيلان طارق وقال بصوت حازم مفيش فيه هزار أنت وهو! إحنا في مستشفى مش في ساحة عرب وعراك شوارع! المتهمة إلهام اعترفت في المحضر المبدئي بعد مواجهتها بتقرير الطب الشرعي ومحادثات الواتساب اللي على تليفونها مع تاجر الأعشاب اللي في الحسين، والنيابة أصدرت قرار بحبسها 4 أيام على ذمة التحقيق وتشميع شقتها لتفتيشها جنائياً فوراً!
طارق وقع على ركبه في الأرض لما سمع جملة اعترفت في المحضر، وحط إيديه على دماغه وفضل يصرخ بصوت واطي ومتقطع كأنه عيل تاه في مولد ليه يا أمي.. ليه عملتي فيا كده.. ليه حرقتي قلبي وبيتي بإيدك؟
خيلانه لما سمعوا كلام الظابط وعرفوا إن إلهام اعترفت رسمي وإن في تاجر أعشاب مقبوض عليه في الحسين، وشوشهم اتقلبت سودة وخافوا يتورطوا في القضية كشركاء، وبدأوا يرجعوا لورا خطوة خطوة، وبصوا لطارق بنظرة تبرؤ وخزي ومشيوا وسابوه مرمي على الأرض لوحده زي الكلب الأجرب.
في وسط الجحيم ده كله، لمبة العمليات الحمرا طفت.. والباب اتفتح ببطء.
خرجت الدكتورة ميرفت، كانت قالعة الماسك، هدوم العمليات الخضرا بتاعتها كانت مليانة بقع دم، وشها شاحب جداً، وعرقان من المجهود.
جريت أنا وبابا وماما عليها، مسكت ماما في إيدها بترجي دكتورة.. ريحي قلبي.. بنتي دينا عايشة؟
الدكتورة ميرفت أخدت نفس طويل ومرتعش، وبصت في عيون ماما بحنان وإرهاق الحمد لله.. قدرنا نوقف النزيف ونعمل استئصال جزئي لجزء تالف من جدار الرحم.. دينا عايشة يا أمي، وعدت من عنق الزجاجة ونقلناها العناية المركزة هتفضل تحت الملاحظة 48 ساعة الجايين لحد ما نطمن على وظائف الكلى وضغط الدم.
ماما سجدت على بلاط الطرقة في ساعتها، فضلت تبوس الأرض وهي بتعيط بصوت سمع المستشفى كلها الحمد لله يا رب.. الحمد لله يا حنان يا منان.. رديتلي بنتي بالسلامة!
بابا غمض عينيه ومسح دمعة تقيلة هربت من جفونه، وحط إيده على كتفي وضغط عليه كأنه بيطمن إننا كلنا لسه واقفين على رجلينا.
طارق زحف على ركبه من مكانه لحد ما وصل عند رجل الدكتورة ميرفت دكتورة.. والطفلة؟ بنتي هتعيش؟ قوليلي إنها هتعيش وأنا هصرف كل مليم حيلتي على علاجها!
الدكتورة ميرفت بصتله بقرف ونفور، وقالتله بنبرة جافة قاطعة الطفلة في حالة حرجة جداً في الحضانة.. الرئة بتاعتها مكنتش اكتملت، والمواد الضارة أثرت على كفاءة الدورة الدموية. نسبة نجاتها 50، وكل ساعة بتعدي هي معركة بينها وبين الموت.. ادعيلها، ده لو كان لسه ليك حق تدعي.
الدكتورة سابتنا ومشيت في اتجاه مكتبها، والعساكر شالوا طارق وخرجوه برا المستشفى بناءً على تعليمات الرائد حسام عشان وجوده بيعمل شغب وتوتر لأهل الحالة.
طلعت أنا وماما للدور التالت، حيث قسم رعاية الأطفال المبتسرين.
القسم كان هادي جداً، معقم، وريحته مطهرات قوية. من ورا الواجهة الزجاجية الكبيرة، شاورتلي الممرضة على الحضانة رقم 7 في الركن اليمين.
قربت من القزاز وحطيت كف إيدي عليه.
البنوتة الصغيرة كانت نايمة جوة الصندوق الزجاجي، ملفوفة في شاش معقم، وعليها حساسات إلكترونية بتنور بلون أخضر وأحمر. كان شكلها ملاك صغير بيحارب شياطين الإنس اللي كانوا عايزين يمحوها من الوجود قبل ما تاخد أول شهقة هوا.
ماما وقفت جنبي، سندت راسها على كتفي وهمست وهي بتمسح دموعها هنسميها إيه يا مريم؟ لما تقوم دينا بالسلامة وتشيلها، هنسميها إيه؟
بصيت للطفلة اللي صوابعها الصغيرة اتحركت حركة خفيفة ولمست جدار البلاستيك من جوة كأنها حاسة بوجودنا، وقولت لماما بصوت واثق ومليان إصرار هنسميها أمل.. عشان هي الأمل اللي فضح الظلم، والنور اللي كسر سواد قلوبهم.
بس فجأة، تليفوني في جيبي رن برقم غريب من غير اسم.
رديت بصوت واطي ألو؟
صوت راجل غريب، خشن ومرعب، كان بيتكلم من تليفون عمومي وشوشرة دوشة شارع جنبه إنتي مريم عبد العزيز؟ قولي لأبوكي يسحب المحضر اللي عمله في قسم مصر الجديدة ضد الحاجة إلهام قبل طلوع شمس بكرة.. وإلا أختك وبنتها اللي في المستشفى دول مش هيخرجوا منها على رجليهم، وإحنا عارفين حتى باب أوضة العناية بتاع دينا فين!
