كانت بتجبر أختي الحامل على أكل الأكل البايت حكـايات مني السيد حصري
الخط قفل في وشي، ورنة التوت… توت… فضلت تضرب في نفوخي كأنها رصاصة.
بصيت لبابا اللي كان طالع السلم وداخل علينا الطرقة، وعرفت إن الحرب مخلصتش بوقوع إلهام في الحجز.. الحرب الحقيقية مع شبكة الناس اللي وراها لسه بتبدأ حالا.
الفصل الخامس
التليفون فضل يزن في ودني بصوت الصفارة المتقطعة بعد ما الخط قفل، وإيدي كانت متخشبة ع الموبايل كأنه حتة تلج. الدم هرب من وشي في ثانية، وحسيت بريق ناشف بيحرق زوري ومخليني مش قادرة أبلع الهوا.
ماما لفت وشها ليا، شافت منظري وإيدي اللي بتترعش، مسكت دراعي بخضة مالك يا مريم؟ مين اللي كان بيتكلم يا بنتي ووشك اتقلب زي الموتى كده ليه؟
مقدرتش أنطق.. كنت ببص للواجهة القزاز بتاعة الحضانة، على الطفلة الصغيرة اللي نايمة بين الأسلاك، وأفتكر جملة الراجل عارفين حتى باب أوضة العناية بتاع دينا فين!. الخوف اتسلل لعضمي زي الإبر؛ دينا نايمة تحت في العناية بين الحياة والموت، متخدرة ومتقدرش حتى تصرخ لو حد دخل عليها، والبنت هنا في الدور التالت محمية بس بباب قزاز وممرضة واحدة سهرانة في النبطشية!
في اللحظة دي، بابا كان وصل لآخر السلم ودخل طرقة الحضانات بخطواته التقيلة، عيونه متبتة في الأرض وشايل هم الدنيا، بس أول ما رفع عينه وشاف ملامحي، وقف مكانه ونبرته الحازمة رجعت في ثانية في إيه يا مريم؟ التليفون ده كان من مين؟
شديت بابا وماما بعيد عن قزاز الحضانة عشان الممرضين ميحسوش بحاجة، ودخلنا ركن مداري جنب أسانسير الخدمات، وقولت بصوت واطي ومتقطع من كتر الخوف بابا.. جالي تهديد حالا من رقم غريب.. راجل صوته خشن بيقول نسحب المحضر ضد إلهام قبل شمس بكرة ما تطلع، وإلا دينا وبنتها مش هيخرجوا من المستشفى دي على رجليهم.. وقال إنه عارف مكان أوضة العناية بتاعة دينا بالظبط!
ماما شهقت وحطت إيدها على بؤها وعينيها برقت بجنون يا داهية دقي! يا لهوي يا عبد العزيز! دول عصابة.. دول هيخلصوا على بناتي في المستشفى! اسحب المحضر يا عبد العزيز، بنتي تطلع في حضني ومش عايزين منهم حاجة.. النار ولا العار يا أبو مريم، دول مش هيسيبونا في حالنا!
اسكتي يا مرا! بابا قطع كلام ماما بصرخة مكتومة بس حادة زي ضربة الكرباج، نسحب إيه ونتنازل عن إيه؟! لو وطينا راسنا للكلاب دول النهاردة، بكرة هيدوسوا على رقابنا في بيوتنا! الست دي عرضت بنتك للخطر ورمت عيلها في السادس، والكلب اللي اتصل ده كلب بلدي بيهوهو عشان نترعب ونرميلهم طوق نجاة تخرج بيه العقربة من الحجز!
بابا لف وشه ليا، وعيونه كانت بتلمع بغضب مفيش فيه ذرة تردد مريم.. الرقم اللي رن عليكي سجلي وقته واديهولي، وتعالي معايا حالا للرائد حسام في نقطة المستشفى تحت. مفيش خطوة تتاخد من غير ما الشرطة والنيابة يكونوا على علم بيها، والأمن هنا هيتقلب جحيم لأي صرصار يفكر يعدي من باب المستشفى.
نزلنا جثة واحدة للدور الأرضي، عند نقطة الشرطة اللي جنب مدخل الطوارئ.
الرائد حسام كان قاعد ورا مكتبه الخشب، قالع الكاب الميري وماسك كوباية شاي بحليب وبيدرس في ملف التحريات المبدئي ومحضر الضبط بتاع إلهام. أول ما بابا دخل وخبط بإيده على المكتب وحكاله تفاصيل المكالمة والتهديد المباشر لحياة دينا وبنتها، الرائد حسام حط كوباية الشاي من إيده برزع خلى السكر يتدلق ع المكتب، وشه احمر وطلع تليفونه الميري في ثانية ألو.. العمليات؟ ابعتلي طاقم حراسة مسلح فوراً على مستشفى دار الشفاء، اتنين عساكر وضابط صف يقفوا خدمة ثابتة 24 ساعة قدام باب العناية المركزة في الدور التاني، واتنين كمان قدام قسم المبتسرين في الدور التالت.. ومفيش نملة تدخل الأقسام دي إلا ببطاقة تحقيق الشخصية ومطابقة إذن الزيارة الرسمي مع إدارة المستشفى!
الرائد حسام قفل السكة، وبص لبابا باهتمام شديد اطمن يا حاج عبد العزيز، مفيش مخلوق يقدر يقرب من بنتك ولا حفيدتك وهما تحت حراسة وزارة الداخلية. والاتصال ده مش من فراغ.. المكالمة دي تأكيد إننا مسكنا طرف خيط وسخ جداً. تاجر الأعشاب اللي اتمسك في الحسين طلع مسجل خطر غش تجاري وبيع مواد محظورة دولياً، وكان عامل شبكة بيتعامل مع حيتان كبار بيهربوا أدوية أورام ومواد كيماوية خطيرة تحت بند زيوت وعطارة، وإلهام مش بس كانت بتشتري منه.. دي كانت الوسيطة اللي بتوزع الخلطات دي على ستات تانية في قريتها وقرى المرج وعين شمس لعمليات إسقاط غير شرعية بمبالغ خيالية!
أنا اتصدمت.. الموضوع طلع مش مجرد كره حما عمياء لخلفت البنات، دي كانت شبكة إجرامية كاملة، وإلهام كانت غرقانة فيها لشوشتها!
يعني يا حضرة الظابط، قولتله وأنا مش مصدقة، المكالمة دي مكنتش من عيلتها بس؟
